4198/2024-2025

Saitual, the 11th February, 2025: Saitual District-a naktuk February ni 12, 2025 (Nilaini)-a General Election to Village Council 2025 inthlan lo awm tur atana polling party te hnenah tukin dar 8:00 am khan inthlan buatsaihna atana hmanrua leh bungraw pawimawh chi hrang hrang te sem niin, an polling station theuh te an pan nghal a, vawiin tlai dar 3:50 pm khan an thleng kim a ni.

Polling party te zingah Dilkhan VC hnuaia 33-Dilkhan polling station te chu thleng hmasa berin zing dar 9:19 am khan an thleng a, thleng hnuhnung ber hi Mimbung VC hnuaia 4-Mimbung-II polling station niin, tlai dar 3:50 pm khan an thleng a ni.

Village Council Inthlanpui 2025-ah hian naktuk zing dar 7:00 am atanga tlai dar 4:00 pm thleng vote thlak a ni ang a, vote hi zan dar 7:00 pm atang chhiar tan a ni ang.

Saitual District huam chhungah hian Village Council 46 te inthlang tur an ni a, polling station 55 leh auxiliary polling station 10 awmin, a vaiin polling station hi 65 a awm a. Hrianghmun Village Council- ah uncontested (chuhpuitu awm lo)-a member pathumte tlinga puan an nih tak avangin Village Council 45-ah inthlan a ni thung ang a, polling station 64-ah vote thlak a ni bawk ang.