Mizoram Governor Dr.K. K. Paul chuan vawiin khan Aizawl hmun hrang hrang – RIPANS, TNT, ATC leh State Museum a tlawh.

RIPANS ah chuan Governor hi Dr. Chawngthanliana, Director leh a thawhpui te chuan RIPANS kalhmang leh helai hmuna zirtirna pek anih dante an hrilh a. Governor hian an hmun hma thenkhat te a tlawh.

Governor chuan TNT a awm ten an thiam thil hrang hrang lam leh brass band  te an lo entir chu lawmawm a tiin hetiang ti thei tur hi chuan inpumpekna leh inkhuahkhirhna tha tak an nei tih a lantir a ni a ti. TNT dintu Pu Sangthankima’n tunhnaia Mumbai-a chawimawina ‘Mother Teresa Award’ a dawng chu he hmun mai bakah Mizoram state pum tan thil chhuanawm tak a ni tiin a hnathawh ropui tak avangin naupang hlim hmel tam tak a hmu thei chu Governor chuan lawmawm a tih thu a sawi. Governor hian TNT tan Rs. 25,000/- a pe bawk. Tunah hian TNT ah full time workers 68, nauhnuchham 420, pangpar huanah 250, De-addiction Centre ah 303 an vaiin 1041 an awm mek a ni.

ATC ah Governor hi Principal Rev. Prof. Vanlalchhuanawma leh a thawpui ten lo dawngsawngin he hmun chanchin tlangpui an lo hrilh a ni.Governor hian State Museum tlawhin Art & Culture Jt. Director Pu Hmingthanzuala leh a thawhpui ten Museum-a thil chi hrang hrangte an enpui a ni.

Governor hi Pu M.S. Rao IAS, Principal Secretary to Governor of Meghalaya leh Pu Manoj Kumar IAS, Secretary to Governor of Mizoram ten an tawiawm a ni.

Zanin hian Governor hian Council of Ministers te Raj Bhavan ah zanriah a eipui ang a, naktukah Shillong panin a kal ang.