Mizoram Youth Commission leh Sub Hqrs Mamit tangkawp buatsaihin thlakhat chhung awh tur Vocational cum Skill Development Course training chu vawiin khan Siamliana Hall, Mamit-ah Dr J.T. Vanlalngheta Secretary Mizoram Youth Commission chuan a hawng.

Training hawnna hun Pu Zatluanga Sailo, Vice President Sub Hqrs Mamit kaihhruaiah Pu J.T Vanlalngheta chuan hawnna thusawiin Condensed Skill Training hi buatsaih tawhnaah chuan a hlawhtlin thin thusawiin MYC pawhin lawmawm a tih thu a sawi a, chhawrtlak thiamna pawchhuak ngei turin training tura inziaklut te a chah a ni. Secretary MYC chuan YMA tawiawmna an hmuh that thinna ah lawmthu a sawi bawk. Skill Development Course hi Kawrthah, Khawzawl leh Kolasib ah te hlawhtling taka neih a lo a ni tawh a, thalai mi 423 hnenah training hi pek a ni tawh a ni.

MYC hian kawng hrang hrangah thalai te tan nasa takin hma a la a, Radiant Integrity Solutions Pvt.Ltd Chennai siam sak Interative web Portal (Job portal tia hriat) chu a enkawl mek a. Hei hi thalai hna zawng mekten SMS hmanga awlsam taka hnaruak an hriat zung zung theih nana buatsaih a ni. Hei bakah hian SDIS hnuaia thalaiten a thlawna phailama training an neih theih nan hmalain, tunah hian VTP hrang hrang-ah thalai mi 1099 training chhuak tawhin heng zinga mi 185 te chuan hna an hmu tawh a mi 914 te pawh Campus Interview hmanga hna zawn sak mek an ni a. MYC kaltlang hian Airhostess-ah mi 6 an awm tawh a, New Delhi-ah mi 18 tirh tum mek a ni bawk.

Sub Hqrs. YMA, Mamit huam chhunga Vocational cum Skill Development Course ah hian Cutting & Tailoring, Beauty culture, Two wheeler, Mechanic, Mobile Repairing, Cement works, Wireman ah te training kalpui a ni dawn a. mi 263 training tur in ziak lutin la in ziak lut hman lo an awm nual bawk a ni.