Chief Minister Pu Lal Thanhawla chuan ‘Kan nurse te hi export quality vek an ni’ a ti. He thu hi Trained Nurses’ Association of India (TNAI), Mizoram Branch in kum 50 an tlin, Golden Jubilee ni nga chhung lawmna tur an buatsaih, vawiina a hawnna inkhawm Vanapa Hall-a an neihah a sawi a ni.

Chief Minister chuan TNAI Mizoram Branch in kum 50 a tling ta chu lawmawm a tih thu a sawi a. Kum 50 hi hun rei tak, mihringte pawh puitling tura ngaih kan ni a ti a, puitlin tawhna atanga puitling leh zual turin tan ila thar ang u a ti a. Nurse hi kristian piangthar tha tak tan lo chuan nih ngam harsa anih a rin thin thu sawiin, a hna hi hna zahawm, tih damna hna a ni hi a ropui hle a ni a ti a. India ah Kerela mi ten nurse hna an thawk tam bera a hriat thu sawi bawk in, Middle East ramahte an thawk tam hle a ni a ti a. Mizoram nurse te pawh ram danga thawk tlak vek an nih angin ram danga thawk hreh lo turin a chah a. Eizawnna anih rualin an chhungte hnenah sum thahnemtak thlatin an thawn thei reng a ni a ti a. Mizoramah kan len vek theih loh hun ala awm dawn avangin helam hawia ngaihtuahna hmang turin a fuih a. Hnamdang tih theih chu kan ti ve thei a ni tih kan hriat a tha Chief Minister chuan a ti.

Chief Minister chuan doctor leh nurse te hian damlo an enkawlte hnenah zuk leh hmuamah an fihlim em tih zawt thin se a duhthu sawiin, a fihlimlote hnenah damdawi ringawt chuan hna a thawk tha tawk thei lovang tih hrilh thin se a ti a. An damdawi chawhte pawh chipchiar takin a hman dan tur hrilh thin tura chah bawkin, hei hian damdawiin a hna thawh tur ang a thawh tir thei a ni a ti.

TNAI Mizoram Branchin hna alo thawhte tarlanna te chu lawmawm a tihpui thu a sawi a. Midangte hmasawnna tura a hmalakna thinte chu a chhuanawm hle a ni Pu Hawla chuan a ti a. Hmasawn tlang zel tur kan ni a, TNAI Mizoram Branchin an inrelbawlna kawngah Director (Nursing) post siam sak leh nurse te mimal leh hospitala chhawr duh ten mumal taka an chhawr theihna tura dan siam sak (legislation) sorkar an ngennaah Chief Minister chuan sorkar chuan a tha thei ang ber hi a duhdan a ni tiin, a department mi ngei hotu a dah hi mahni hamthatna atan nge, kan zavaia atana kan that tlanna tur ni ang tihte ngaihtuah a ngai thin a ni a ti a. Lungrual taka kan kal chhoh tlan hi a tha ber a ni a ti.

TNAI hi India ah European Nurse ten kum 1908 khan an din a, tunah hian state tinah din a ni.TNAI Mizoram Branch hi a dintute zinga mi ngei Pi V.Zochami, Executive Committee Member, TNAI in a tobul sawiin, kum 1964 ah TNAI Gen Hqrs New Delhi ah din phalna dilin, kha tih laia Mizoram chu Assam State a district pakhat ve mai la ni, New Delhi chuan State kan nih loh avangin ‘District Sub Branch’ anga din phalna rawn pein, ni 24, August 1964 khan Civil Hospital, Aizawlah din ve a ni tak thu a sawi a ni.

Hawnna inkhawmah hian Pi Lal Riliani, President, Indian Society on Tobacco & Health Mizoram Chapter in chawimawina thilpek TNAI Mizoram Branch dintu la dam te hnenah leh rampum huap nurse chawimawina dawng tawh, National Awardee te leh TNAI member kum 80 chunglam te hnenah a hlan bawk a ni.

Kalkhawmte lawmna thusawi Pi Lalfamkimi, President, TNAI Mizoram Branchin a hmang bawk a. Golden Jubilee lawmna la kal zel turah hian exhibition, flower show leh inelna dang dangte,thisen pekte, Students’ Nurse Association (SNA) te tan lam leh inzaisiak te an nei dawn a, a kharna ni 15 November 2014 ah ruai nen Mizoram College of Nursing (MCON), Falkawnah an hmang thung ang.