Ni 8.10.2018 khan October Ni 8-12, 2018 thleng neih tur ram pum huap workshop ‘Capacity Building Programme for Teacher Educators in Construction Pedagogy’ hawnna hun Institute of Advanced Study in Education (IASE) Auditoirium-ah neih a ni a. Mizoram Governor Pu Kummanam Rajasekharan chuan hmanpuiin workshop hi Institute of Advanced Study in Education (IASE) huaihawt a ni.

Khuallian Mizoram Governor Pu Kummanam Rajasekharan chuan IASE ten zirna lama hmasawnna atana tangkai em em tur workshop an buatsaih chu lawmawm a tih thu a sawi a. IASE chu zirna in tha leh rintlak tak, hmasawn chak em em a ni tiin zirlaite pass percentage pawh a sang thin hle a ni, a ti a. Zirna hi kan ram hmasawn nana ban pawimawh tak pakhat a ni a, chumi atan chuan zirtirtute an pawimawh hle a ni, a ti a. Zirtirtu tha chuan kawng engkimah zirlaite hmasawntir an tum tur a ni tiin zirtirtute pawhin intuaitharna hun an neih a ngai a ni, a ti a. Kalkhawmte hnenah chuan kan ram chhunga zirna quality san leh san loh hi zirtirtuteah a innghat thuk hle a, in inpekna sang tak hian rah tha a chhuah ngei ka beisei tlat a ni, a ti a. Thalai chhawrtlak leh hmantlak chherchhuah nan zirtirtute tangkaina a tarlang a. Workshop tha tak nei turin duhsakna a hlan nghal a ni.

Workshop hi ni nga (5) chhung neih tur niin Mizoram chhunga DIET leh MZU zirtirtute an tel dawn a. Mizoram chhunga Teacher Educator ten kawng hrang hranga zirtirna leh zirna lama hma an sawn ngei theih nana ruahman a ni. School of Education IGNOU Director Prof. SarojPandey, NCERT Department of Teacher Education Professor Dr. Madhulika S Patel leh NCERT Educational Survey Division Consultant Dr. Parul Singh te resource person niin New Delhi atangin an rawn telpui a. Thupui pawimawh tak tak Assessment and Enhancement of Time Management Skills for Self Improvement and Productivity, Knowledge Discipline and Subject, Teacher as a Reflective Practitioner, Assessment for Learning and Learning Outcomes, Teacher Education: The Paradigm Shift tih leh thupui dang hmangin workshop hi neih a ni ang.

Workshop hawnna programme hi GAD leh Higher & Technical Education Commissioner & Secretary Pu Ashish Kundra chuan a kaihruai a. IASE Principal Prof. Vanlalhruaii chuan kalkhawmte lawmna thu a sawi a. IASE Associate Professor Dr. Lallianzuali Fanai chuan workshop sawi zauna hun a nei a. IASE Associate Professor Dr. Lalhmingliana chuan lawmthu sawina in hun a khar a ni.