India rama kum 2005 atanga hman tan,  khua leh tuiten an dikna leh chanvo an hmuh theihna tura puitu,  sorkar langtlang siamtu, eirukna do  leh  venna tura siam Right to Information Act hapta khat chhung hman tur chu vawiin khan Government Champhai College, Multipurpose Hall-ah hman a ni a. He hunah hian Pu Lalduhthlana Ralte, State Chief Information Commissioner (CIC) chu khuallian niin, Champhai Districta RTI Week hawnna a nei a ni.

State CIC Pu Lalduhthlana Ralte chuan RTI chu langtlang sorkar siam nan leh sorkar  khalh ngilna dan anih thu sawiin, Mipuite sorkarna leh zalenna ramah mipuite chanvo leh dikna, sorkar a an thil hriat duhte fiahfai taka hriattir anih theihna turin RTI hi duan anih bakah sorkar khalh ngilna hmanraw tangkai tak anih thu a sawi a. India ram bakah Mizoram ngeiah pawh RTI hi tangkai taka hman chhoh mek anih thu leh tangkai leh zuala hman chhunzawm zel anih theih nana tanlak zel anih tur thu a sawi a. Khua leh tuite chu an dikna leh chanvote hriaa  zawh leh hriat duh an neihte Department tina officer ruat bikte hnena zawhfiahna chang hre turin a chah a. Sawrkar department te pawh mipuite  hriat ve tur thilte puanzar kawnga tan la zual tura fuihin, tun aia nasa zawka Sawrkar department te pawhin an department nihphung leh hnathawhte an puangzar theih nana hmalak anih tur thu a sawi a. RTI Act chuan Sawrkar hi mipuite ta ani tih  lantirin chanvo a pe a, tangkai taka hman thiam anih chuan Sawrkar leh mipuiten an chhawr hle dawn a ni, a ti a. RTI enkawltu ruat bik officer te chu an dawngdah thianglo a, mipui rawngbawlna mawhphurhna sang tak an nei a ni tiin record tha taka vang tha turin a chah a. RTI Week chu kum tin Khua leh tuiten chiang zawka an lo hriat thar zelna tur atana buatsaih thin anih thu sawiin, hun hmang tura kalkhawmte chu RTI Week belchianga chhawr tangkai tum theuh turin a chah nghal a ni.

RTI hapta hawnna hun zawh hnu hian chawhnu lamah program neih chhunzawm niin,  Champhai DIPRO kaihhruaina hnuaiah chipchiar zawka RTI zirhona neih a ni a. Pu Remlalliana Hnamte, SO, Land & Revenue Department chuan fiahfai taka RTI dan a sawifiah bakah RTI dan kalpuina tura mipui lam hriattur leh sorkar lam chanvo a hrilhfiah a. RTI chungchang sawihona hun neih hnu hian zawhna leh chhanna hun hman nghal niin kalkhawmten an hlawkpui hle a ni.

RTI Week, Mizoram Information Commission leh Directorate Information & Public Relations Department tangkawp buatsaih hi Champhai DIPRO Dr Lallawmkima chuan  kaihruaiin,  Addl. DC Champhai Pu K. Vanlalthiana'n RTI nihphung hrilhfiahna leh kalkhawmte lawmna thu a sawi a. Pi Esther Leihang, SDC Champhaiin lawmthu sawina neiin hun a khar a ni.

RTI Week hawnna hunah hian Sorkar Department hotute, College zirlaite, NGO hruaitute, khawtlang hruaitute leh Media mite an tel a ni.