1690/2024-2025

Aizawl, the 22^nd  August, 2024: Governor Dr Hari Babu Kambhampati chuan vawiin chawhma  khan Mizoram Lok Ayukta Member leh Mizoram Public Service Commission (MPSC) member thar te chu rinawmna thu tiam tirin a lalut a. Mizoram Lokayukta Judicial Member ruat thar hi Pu Joel Joseph Denga, MJS Retired niin MPSC Member ruat thar hi Pu K. Lalhmingliana, MCS Retired a ni thung.

Swearing in Ceremony program hi Dr Renu Sharma, Chief Secretary chuan a kaihruai a. He hunah hian Chief Secretary chuan appointment order a chhiar chhuak hmasa, hemi hnu hian Governor Dr Hari Babu Kambhampati chuan Mizoram Lok Ayukta Judicial Member thar leh MPSC Member thar te chu rinawmna thu tiam tirin a lalut a ni.

Mizoram Lok Ayukta Member leh MPSC Member thar lakluhna Inkhawmah hian Chief Minister Pu Lalduhoma a tel a. Speaker Pu Lalbiakzama, Cabinet Minister te, Minister te, MLA te  leh mi pawimawh dangte an tel  tha hle a ni.

Lokayukta Judicial Member thar  Pu Joel Joseph Denga hian thiamna lamah BA, LL.B degree te a nei a. Kum 1998 atang khan Advocate hna a thawk tan a, 24.5.2011 khan Mizoram Judicial Service-ah a lut a, Law & Judicial Department hnuaiah hna pawimawh tak tak a thawh hnuin 26.2.2014 khan Member Secretary, MLSA hna a chelh leh a. Hemi hnu 12.1.2018 khan District and Session Judge-ah a kaisang a, Special Judge, NIA Special Court, District and Session Judge, Lunglei, District and Session Judge, Aizawl, Registrar, Gauhati High Court te pawh lo ni tawhin Lok Ayukta Judicial Member atana ruat a nih lai hian District and Session Judge, Aizawl hna a chelh mek a ni.

Kum 1964 June 10 khan Pu Joel Joseph Denga hi a lo piang a, a nu leh pa te chu C.Chaldenga(L) leh Pi Mary Doris (L) te an ni a. Tunah hian a nupui Pi PC Lalhmingliani leh a fate 3 nen Tanhril Vengah an cheng mek a ni.

MPSC Member thar  Pu K.Lalhmingliana hian BSc (Hons) degree a nei a. Dt 01.04.1998 khan Mizoram Civil Service (MCS) ah a lut a, MCS Junior Grade, Senior Grade leh JAG a nih laiin Mizoram hmun hrang hrang leh department hrang hrangah nihna pawimawh tak tak chelhin a thawk kual tawh a. DM&R, LAD leh Fisheries ah te Joint Secretary hna a thawk tawh a, LR&S leh LESDE-ah te Director hna a chelh leh hnuin Addl. Secretary hna FCS&CA,C&I leh LESDE-ah te a thawk leh a. MPSC Member thar atana ruat a nih lai hian Municipal Commissioner, AMC hna a chelh mek a ni.

Kum 1966 Februay 6  khan Pu K.Lalhmingliana hi a lo piang a, a nu leh pa te chu Sub. Airuma (L) leh Pi Lalhlimpuii Sailo (L) te an ni a. Tunah hian a nupui Pi F. Lalhlupuii leh a fate 2  nen Sawrkar Quarter, MINECO-ah an cheng mek a ni.