1691/2024-2025

Dated Kolasib the 22nd August 2024: Kolasib DC Pu Robert C. Lalhmangaiha chuan Vawiin chawhma  khan Kolasib a MJA Member te chu a Office Chamber ah kawmin, Kolasib District chhunga Lirthei enkawltuten Kawngpui tha phut avanga Lirthei tlan an remtih loh chungchanga a hmalakna a hrilhfiah.

Kolasib DC Pu Robert C. Lalhmangaiha chuan Kolasib District chhung a Lirthei enkawltu pawl hrang hrangten a lungawi lohna an lan tir thu sawiin, 'Lirthei enkawltute hian lungawi lohna lan tir an tum hi tun thla ni 19 khan Press Conference neiin an puang chhuak tawh a. Hei hi hriat a nih ve leh hmalak nghal a ni' a ti a. Press Conference neih tlaiah hian Kawng siamtute ko khawm nghalin Kawng chhe zualpui hnawh tura hriattir an nih thu a sawi a. MPWD Highway Division lam chuan Meeting thu bawhzui hian kawng khuar chhe zual lai  an hnawh tan nghal tih a sawi a. NHIDCL pawhin an hnuaia Contractor te chu ni 15 chhung hun tiam pe in , kawng chhezual lai hnawh mam turin an hriattir tih a sawi.

Kolasib DC chuan Kolasib District chhunga Lirthei enkawltute chu koin nizan ah Meeting a neihpui thu a sawi a. Hetah hian an hmalakna hrang hrangte pawh sawilan a nih thu te sawiin, Lirthei tlan tir lo tura hma an lakna chu kaltlangpui lo tura ngen an nih thu a sawi. 

Amaherawhchu  Lirthei enkawltuten an hmalakna te kaltlang pui an tum tak si avangin DC leh District Magistrate a nihna angin Law and Order kenkawh ngaihna thil duhawm lo thleng lo se tih chu a duh dan a ni, a ti a. Hei bakah hian ' mipuite tan harsatna thlen lo se kan duh' a ti a. Hei hi Sorkar thuneitute dinchhan leh an ngaihtuah ber tur a nih thu sawiin, Kolasib DC chuan a Office leh administration-a a thawhpui zawng zawngte chuan kawng (NH) siam hnathawktu hrang hrangte chu nasa leh zuala an hna chak taka an thawh theihna tura hma an lakpui tur thu leh an vilzui tur thu a sawi.

He hunah hian MJA Kolasib te hi an President Pu Andrew Vanlalauva'n a ho a. Kolasib DC hi Pu David H. Lalthangliana SP Kolasib, Pu H. Lalramliana SDO(S) Kolasib, Pu ST Lalhmingmawia DLAO Kolasib leh Pu Lalmuan Puia DRDO Kolasib bakah Pu David A Lalhmingchhuana, DIPRO Kolasib ten an tawiawm a. MJA Member te nen hian  kawng tha zawk nei tura chak zawk a hmalak ho dan turte huam zau takin an sawi ho bawk a ni.