Nimin khan zan khat riak turin Mizoram Governor Pu Vakkom Purushothamam chuan Lunglei thleng Lunglei DC Compound ah amah lawmna vantlang inkhawm buatsaih a ni.

Governor chuan Mizote a ngaihnat thu sawiin Mizoram chu ‘God’s own Country of the East’ tih phu khawp in a mawi a ni a ti. Mizoram a tlang mawi tak tak leh ramngaw te chu a chhunga cheng Mizoram hnam hrang hrang te nunphung nen a in chawih rem hle a a hriat thu a sawi. Mizoram in ei leh bar a intodelh nan leh hma a sawn chak zawk theih nan a pawimawh pathum te chu tourisim tih changtlun, thalai te tah hriam leh industry tam zawk din te a nih thu sawiin, khualzin mite tlawh chak khawp in Mizoram chu chei a rem a ni a ti.

Sawrkarin mi zawng zawng tan hna a siam sak theih loh avangin Mizo thalai te pawh hmun hrang hrang leh ram hrang hrang ah hna thawk turin rilru leh thiamna lamah an in tah hriam a hun takzet thu a sawi a, Mizoram chu ziak leh chhiar a a san tluk zet in Education ah pawh a duai lova ram pawna thawk tur man power tam tham tak a nei a ni a ti. Larsap chuan ram hmasawn nan chuan kan pawisa hmang a kan puitlin theih loh industry lian tak tak te kan ram ah kan sawn luh a ngai a ni a ti. Ram mipui te leh Politician te pawh industry din chungchang a harsatna siam lo turin a ngen thu sawiin, Industry tam zawk Mizoram sum deh chhuah pawh nasa takin a pun tur thu a sawi bawk.

Sawrkarin hna thawhna leh hmasawnna ruhrel siam nan sum a mamawh te hi chhiah atang lo chuan hmuh theih a ni silova, hemi kawng ah hian mipuiten sawrkar kan thlawp a ngai a ni a ti. Larsap chuan North East Games 2012 ah Mizo thalai infiam mite hlawhtlinna chu chhuanawm a tih thu sawiin, hlawhtlinna lian zawk paw chhuak zel turin duhsakna a hlan thu a sawi a ni. Mizoram state lian tham lo hi sports infrastructure ah chuan a chhuanawm lawt lak a ni a ti.

Larsap lawmna vantlang inkhawm hi Lunglei DC Pu V.Sapchhunga, IAS in kaihhruaiin Lunglei District a sawrkar hmalakna lian tham deuh deuh te a tarlang nghal a.

Larsap hi a nupui leh a tunu bakah a Secretary Pu K.Lalnghinglova, IAS leh Official thenkhat in an zui bawk a ni.