622/2022-2023
Aizawl,the 25th May 2022: Vawiin khan Electric Veng Branch, Mizoram Rural Bank(MRB) 100-na chu Governor Hari Babu Kambhampati chuan a hawng a. He branch hi India rama a hmasaber pawl niturin Micro, Small and Medium Enterprises(MSME) dedicated bank branch a ni dawn a ni.

Governor Hari Babu Kambhampati chuan Mizorama Bank darh zau ber, customer nei tam ber, pawisa dahluh tam lama pahnih leh pawisa puktir tam lama pakhatna ni mekin Branch 100-na atan MSME dedicated bank branch, Aizawl Electric Vengah an hawng chu hlawhtlinna chhinchhiah tlak a ni a ti a. Mizoram mipui te tan MRB chu malsawmna ni chhunzawm tur leh bank dawr nuam pawla an sawi ni chhunzawm zel turin duhsakna a hlan nghal bawk.

Bank hrang hrang hotute a kawm tawh thu te, Mizoram mipui tana an hnathawh dan a zawh uluk thin thu leh an tanlak ngai lai te a sawi thin tih a sawi a. Mizoram mipui nuai 12 chuangah hian chhungkua nuai 3 vel awm angin kan chhut a nih chuan chhungkaw tinah bank account pakhat zel a awm niin a ngaih theih a. Hei hian Mizoram chu financial inclusion bikah chuan India rama a ti tha pawl tak a ni tih a ti chiang hle a ni a ti. Hemi dawtah chuan Sum leh pai enkawl leh peipunna kawnga inzirtirna(financial literacy), digital transaction leh online kaltlanga insumdawna kawnga hmasawn hi kan tum leh tur a ni a ni.

India ram economy a sum thawkchhuak tam ber chu sumdawng tenau zawk te - Micro, Small and Medium Enterprises(MSME) an ni a, Mizoramah pawh MSME ten sum an thawkchhuak tam ber a. Heng sumdawng tenau te pual liau liau a MRB Branch thar hawn a ni ta hi hlawhtlinna mellung chhinchhiah tlak tak a ni a ti.

MRB hian mipui te tan banker hna a thawk satliah loa, mipui te hamthatna tura scheme tha tak tak - central welfare scheme a customer ziah luh kawngah an thawh hlawk hle bawk a. Pradhan Mantri Jeevan Jyoti Bima Yojana, Pradhan Mantri Suraksha Bima Yojana, Atal Pension Yojana, Pradhan Mantri Kisan Samman Nidhi, PM SVANidhi, etc te customer ten an dawn theihna tura Bank thawk tha ber niin a hmahruaitu an ni mek a. Hei Bank dangte pawn lo hria se ti ve turin ka ngen a ni a ti.

MRB tana ni chhinchhiah tlak takah thinlung takin Chairman leh MRB hnathawk mek leh lo thawk thin tawh zawng zawng te a lawmpui tih a sawi bawk a ni. MRB Electric Veng Branch chu MSME te tana dawl awlsam bik tura duan a ni a ti.

Pu V.Jaya Chandra,Chairman, MRB pawhin thusawiin kum 1983 leh tun inkara MRB a lo thawk tawh zawng zawng leh thawk lai te inpekna avangin MRB chu vawiinah chuan India Hmarchhaka RRB tha ber a ni tawh a ti a.
He branch hian kum 1 a hman hunah Rs 100 crore sumdawnna neih hman a tum dawn tih a sawi bawk. Tunah hian Mizoram pumah Customer Transaction/Service point 330 a awm mek a, kum 2 chhungin Mizorama khaw tinah CSP hi neih a MRB chu khawtinah dawr theih a siam a ni dawn a ti. MRB chu India hmarchhak a Bank zingah District capital zawng zawng leh Revenue Block zawng zawnga bank nei awm chhun a ni tih sawiin kum reiloteah branch 12 vel Mizoramah hawn belh leh a ni dawn a ti bawk.

MRB Electric Veng Branch hawnna inkhawm hi Pu Samuel L Warbah, GM, N-II chuan a kaihruai a. Pu V.Jaya Chandra,Chairman, MRB in technical report tawi pein inlawmna thu a sawi a. Pi Vanlalhumi, CM (P&OA) in lawmpuina thilpek hlanna hun a hmang a. Pu Rosiamngheta, Councillor, Ward V leh President, Mizoram Automobile Dealers Association te pawhin thu an sawi a. Pu Lallawmzuala Renthlei,CM(NPA) in lawmthu sawiin huntawp a khar a ni.