Mizoram Science, Technology and Innovation Council (MISTIC) leh science lama pawl 7 tangkawpte buatsaih, ni hnih awh tur Mizoram Science Congress 2018 hawnna inkhawm chu vawiin khan Pachhunga University College-a Multipurpose Auditorium-ah neih a ni a. Mizoram Governor Pu Kummanam Rajasekharan chu Khuallian a ni.

Pu Kummanam Rajasekharan chuan science leh technology chu kan nitin nuna thil pawimawh tak, kan nitin mamawh te kan neih theih nan leh khawsak phunga harsatna hrang hrangte sukiang thei tura pawimawh tak a nih thu a sawi a. Science leh technology lama ram changkang apiangte chu ram hausa an ni tiin, technology lama an thiamna chuan a dah chungnung bik a ni, a ti. Mizoramin socio-economic development kawngah ziak leh chhiara a thiam avangin ramdangte a  lehpel thei a ni tiin, chutiang tihlawhlting tur chuan zirtirna tha, a bik takin science leh technology lama zirtirna tha a pawimawh hmasa a ni, a ti. Eco-tourism, horticulture, forestry leh thing leh mau humhalh te chu Mizoram hmasawn theihna nia a hriat thu a sawi bawk a ni.

Chief Scientific Officer leh MSC 2018 Organizing Committee Chairman ni bawk Dr. RK Lallianthanga pawhin Congress chu discipline hrang hrang atanga scientist rual, zirlaite leh science lama tui mi te tana intawhkhawmna remchang a ni, a ti a. Mizoram Science Congress vawi-2na chuan Mizoram chhunga science inzirtirna leh research lamah harh tharna a thlen a beisei thu a sawi a ni.

Indian Institute of Science (IISc), Bangalore atanga lo kal Prof. MRN Murthy chuan kumin thupui - “Perspective and trends in the development of science education and research” chungchung a sawi a. MSC 2018 Organizing Committee Secretary Dr. Laldinpuia pawhin Mizoram Science Congress 2018 chungchang report a pe a ni.

He Science Congress 2018-ah hian Professor 11 - Mizoram pawn atangin professor pathum an tel thei a. Parallel technical session 4 buatsaih  niin abstract paper 110 thehluh a ni a, science model 24 pholan a ni bawk.