Vawiin chawhma khan Aijal Club-ah Finance Principal Secretary Pu Lalnunmawia Chuaungo chuan  Skill Development Training petute tana National Skill Qualification Framework(NSQF) zawm a tulna chungchang inzirtirna,  "Advocacy Workshop on NSQF" chu a hawng.

Advocacy Workshop on NSQF hawngtu, Principal Secretary Pu Lalnunmawia  Chuaungo chuan tunlai thiamna thang chak lutuk avang te leh mipui mamawh a inthlak danglam zung zung avang tein Skill Training a zirna te pawh uluk taka kalpui a ngai a.  Training chhunga zirtirna ten  hnaruak hnawhkhah turte leh hnathawhturte  a mil pha thin lo chu training petute tana chona a ni a ti.  Zirlai ten Skill Training an neih hnuin zirna sang zawk zir leh turin kum an hloh thin a. Chu chu siam that a nih theih nan training na atana hun an hman zah leh chu mi hun chhunga school pangaia pawl an sawn theih zah ang te pawh enge maw ti zawnga siam rem a ngai a ni a ti. Mizoramin Skill Development and Entrepreneurship Policy tha tak a duang tawh tih a sawi a. Skill Development huangah training tha tak pe thei,   khawvel pum huapa Company lian te pawhin sawrkar an rawn dawr thu leh sawrkarin a zir chian mek thu pawh a sawi a ni.

Tun dinhmunah LEDSE report pek dan chuan hnathawk thei rual kum 14 leh kum 59 inkar te chu Mizoram mipui zawng zawng zinga 60.3 % a ni a.  Mizoram sawrkar Department 14 in Skill Training an kalpui mek a; sawrkar in a pawmpui skill training pe thei, Skill Development Initiative scheme, Ministry of Skill Development & Entrepreneurship, Government of India hnuaia Online Registration nei, Vocational Training Providers(VTPs) 24  leh Vocational Subject lak theihna Higher Secondary School 25 a awm mek a. Heng  zirtirna petute hian NSQF duh dan leh ruahman ang thlapa an zirtirna te an kalpui a ngai tawh a. Hun reiloteah NSQF tehfung pha lo leh kalpui lote chuan sawrkar atangin tanpuina an dawng thei tawh dawn lova. Sawrkar leh Public Sector Undertaking(PSUs) hnuaia hnaruak lak tur reng reng pawh NSQF duhdan ang thlapin a dil thei chin( eligibility criteria) pawh siam a ngai tawh dawn a ni.

Advocacy Workshop on NSQF hawnna hun chu Pu Zothan Khuma, Commissioner & Secretary, Labour, Employment, Skill Development & Entrepreneurship  Department(LEDSE) chuan a kaihruai a. Pu Lalhmunsanga Hnamte, Director, LEDSE  hnen atangin  State Skill Landscape & Policy chungchang ngaihthlak a ni. He workshop hawnnah hian  " Skill Mizoram" Emblem inziahsiak result chu puan a ni a. Pu Thuamlalmuana, Bungkawn Vengthar lemziah chu "Skill Mizoram" Emblem a tan puan a ni.  Advocacy Workshop-ah hian inzirtirna hun, Technical Session I leh II a awm a. He hunah hian Skill Training Nodal Department aiawhte leh VTP hrang hrang  aiawh ten zirtirna Central Sawrkar rawn tirh mithiam te hnen atangin an dawng a. Ministry of Skill Development & Entrepreneurship hmalak dan, National Skill Development Agency hnuaia hmalakna, NSQF chungchang, National Labour Market Information System, Recognition of Prior Learning, Pradhan Mantri Kaushal Vikas Yojana, Industry Qualifications leh thil pawimawh dang te inzirtir a ni.