Non Lapsable Central Pool of Resources (NLCPR) sum cheng nuai 1988.00 senga  Champhai khaw daia luang Keilungliah Lui khuaha Recreation Centre  leh Dam Reservoir siamna tur lung chu vawiin khan Champhai North bialtu MLA Pu TT Zothansanga’n a phum.  

Khuallian Pu TT Zothansanga chuan Keilungliah khuah anih theihna tura lung phum ani chu lawmawm tiin, hna tan anih theihna tura sulsutu sawrkar official, khawtlang hruaitute, ram hlantute leh Champhai NGO Coordination Committee-te thawhhona chu a fak a. Keilungliah Lui khuah hna chu khawtlang huapa inrawnkhawmna te neih anih avangin tum angin a kal chak tawk lo a  ni tiin, lung phum ani ta chum mel lung pawimawh tak a bul tanna chauh ang anih avangin a hlawhtling  theihna turin kan zavaia thawhho  angai a ni, a ti a. Keilunglah Lui khuap turin harsatna tam tak paltlang anih thu tarlangin, a project kalzelna turah theihtawp a chhuah thin thu leh Chief Minister leh PHE Minister-ten an thlawp tlat avanga tawpsan mai lova tun hi thleng thei a ni, a ti a.

MLA chuan Social Media hman fimkhur a tul thu sawiin, thil dik famkimlo leh belhchian dawllo vawrhdarh nana hman a him loh thu a sawi a. Tunhnai kum 10 chhungin a bial chhunga inkalpawhna tha siam kawnga nasa taka hmalak a ni a, PMGSY kaltlangin cheng nuai 12520 senga inkalpawhna siam that a ni, a ti. Champhai leh Seling inkar kawng double lane-a siamna tur chu DPR peihfel vek tawh tender chhuah mai theih a peih anih tawh thu a sawi a. Cheng vaibelchhe 137.47 sengin Champhai leh Zokhawthar inkalpawhna siam mek a ni a, hemi ken tel chiah loh phai zawl kawngpui pawh huam niin, phal taka ram hlan tute chu a fak a. Champhai khawpui kawng cheinan tun financial year chhungin cheng nuai 165.75 dah anih thu a sawi bawk a. Champhai North bialtu chuan a bial chhunga Zirna In, RMSA leh School pangaite thahnem tak sak a nih thute, School 7 upgrade mai theiha kalpui mek leh Govt. Champhai College Building cheng nuai 951 senga sak hawn ani tawh bawk a ni, a ti a. Power Sub-Station pahnih Keifangtlang leh Rabungahte hawn anih tawh thu leh Hnahlan leh Rabung PHC hawn thar anih mai bakah Champhai Session Court awm ta te chu lawmawm a tih thu a sawi a. Champhaiin Auditorium changtlung taka neih theihna turin hma  chak taka lak anih bakah Zotlang Truck Terminal cheng vaibelchhe 5 senga sak mek anih thu a tarlang bawk a. Champhai khaw mipuite chu Keilungliah Lui khuah a lo puitlina tangkai taka chhawr anih ngei theihna tura thawhpuiah a sawm nghal a ni.

Keilungliah Lui khuah tur hi M/S S.S Construction, Chaltlang Aizawl chuan a thawk dawn a, First Phase hmanga thawh turah Lui khuauh tur san zawng hi Metre 20 niin, a thuthmun chhah zawng hi metre 14 leh a chung lam chhah zawng metre 4 ani ang a, a hnuai thuthmun khuahna sei zawng hi metre 54.61 niin a chung lamah chuan metre 102.60 ani dawn a. A kamah ke a kalna tur kawng metre 1.50 zai zaia siam tur a ni a, tlak danna siam tur niin a hmun panna kawng tha tawk tak siam tur a ni bawk. Keilungliah khuah hna hi March, 2020 a zawh tur niin, tui litre nuai singthum leh sangnga vel tling tur anga chhut a ni a. Lui khuah hi Champhai khawpui tui mamawh phuhruk nan leh Phaizawl buh leh bal chawm nante, khualzin hipna tur, Sangha khawina leh Champhai khawpui timawia boruak lum tiziaawm thei tura ruahman a ni.

Vawiin hun hi Er J.Kapkima, EE, PHED, Champhai WATSAN Division chuan a kaihruai a. Er.H.B Chakma, SE,PHED, Champhai WATSAN Circle chuan Technical report a pe a. Pu Hmingsawipuia, VCP Champhai Vengthar-in lawmthu sawiin hun a khar a ni. He hunah hian sawrkar departnment hotute, Media, NGO leh khawtlang mipuite an tel a ni.

 

Attachment

  • Loading attachment...