Vawiin ah khan Mizoram Governor Lt Gen Nirbhay Sharma (Retd) chuan Chief Rector of MZU a nih angin 11th Convocation of Mizoram University a hmanpui a. MZU Campus, Tanhril a neih MZU Covocation vawi 11-na ah hian Profeessor Mrinal Miri, Padma Bhusan Awardee, Former Member of Parliament , Vice Chancellor, NEHU leh nihna pawimawh tak tak te lo chelh tawhtu chu khuallian a ni a.

11th Convocation of MZU ah hian Degree course hlawhtling taka zirchhuak mi 3855 hnenah Degree hlan niin chung zinga 742 te chu he convocation ah hian an tel a ni. Convocation programme ah hian Mizoram Governor Lt Gen Nirbhay Sharma (Retd) chuan Doctor of Philosophy(Ph.D) nihna degree mi 53 hnenah hlan in Gold Medal dawngtu mi 38 hnenah Prof. Mrinal Miri chuan chawimawina thuziak leh tangkapui a hlan thung.

Chief Rector of MZU, Lt Gen Nirbhay Sharma (Retd), Mizoram Governor chuan Zitirtu te leh zirlai te fuihna thusawiin Mizoram University chu Mizoram chhunga zirna in sangber a nihna anga state hmasawnna atana theihtawp chhuahtu leh zoram hmasawnna kalsiam reltu pawimawh tak a ni a ti a. Degree ropui tak tak dawngtu, mithiam te chu a lawmpui tih sawiin Convocation programme a zawh hnu hian chona hautak tam tak an hmachhawn tan dawn tih tarlang in ram hmasawnna atana theihtawp chhuah turin an rilru te an inpuahchah tan a ngai a ti. Subject zawng zawng a pawimawh vek tih sawiin Mizoram University chuan Mizoram mamawh bik subject thenkhat skill development, organic farming, environment leh traditional medicines huang bik erawh a khalh fal deuh bik a tul ni a a hriat thu a tarlang a ni.

‘The Nation and Its NorthEast’ tih thupui hmanga a inbuatsaihna te Prof. Mrinal Mirini chuan convocation chhim tute hriat ah sawi zau in India ram tana hmarchhak bial dinhmun pawimawh tak tak te a tarlang a. India ram Hmarchhak mite India ram ropui tak ah lungsi taka an khawsak nan midang zawng ten hmarchhak mite ziarang,nundan, khawsak dante, an ngaihhlut zawng te leh an sakhaw vawn chungchang te chiang zawka an hriat a pawimawh tak zet thu a sawi a. Hmarchhak a cheng te pawhin India ram ropuina leh ram dang aia India danglamna - a chhungah thil chi hrang hrang te leh mihring khawsak inanglo tak tak te a inremkhawm tih an hriat a ngai a, India taksa peng pakhat, a tel lova India nihna famkim thei lo anga inhriatna an neih a pawimawh hle a ni a ti.

11th Convocation of MZU hun hman dan hi Prof R. Lalthantluanga, Vice Chancellor, MZU in kaihruaiin Prof Lianzela, Seniormost Professor, Prof Margaret Ch. Zama, senior Professor leh Pu C. Zothankhuma, Registrar ten Vice Chancellor an puihbawm a. MZU Convocation ah hian mi 23 hnenah Book Prize lawmman hlan nghal a ni.