Vawiin chawhma ah khan Mizoram Governor Lt Gen Nirbhay Sharma (Retd) chuan khawvel a tlang sangber, Mt. Everest han lawn chhuak tawh, Pu David Zohmangaiha leh Nl. Lalrintluangi te Raj Bhavan ah a kawm.

Mizoram Governor Lt Gen Nirbhay Sharma (Retd) chuan a inleng te chu a chhuan thu leh a lawmpui thu hrilh in Mt. Everest lawn tur a an inpuahchana te a zawt a. Mizo tlanglawnmi 2 te hnenah hian Lawmpuina thilpek leh Raj Bhavan in a ngaihhruihna thuziak a hlan nghal a ni.

Pu David Zohmangaiha leh Nl. Lalrintluangi te chuan Mt. Everest lawn tura tlanglawnmi tamtak zinga thlan an nih dan te leh hun rei tak chhung training hautak neih hmasak pui an nih thu te an tarlang a. Mt.Everest an lawn chhuah hnu hian hmun tak tak ah thalai pual inkhawmna, puipunna leh sikul ah te sawm an nih thu tarlang in Mizo mipui in an hlawhtlinna an lawmpui chu ropui an tih thu an sawi a. Mizoram Governor chuan Mizo zinga Mt. Everest lawnchhuak hmasaber pahnih te tumruhna leh chhelna te chu Mizo thlai ten entawn se a duhthu, a inleng te a titi pui na ah hian tarlang in Mizo thalai tam zawk in hriselna dah pawimawh an mamawh a ti a .” Mizo thlalai ten khawvel a tlang sangber Mt Everest an lawn chhuah theih chuan eng anga chonna lian pawh an hneh vek thei tih a chiang a ni’, ti in hriselna kawnga Mizo thalai te tan a chonna a chhawp chu tih puitlin theih a ni a ti a. Governor chuan hriselna tel lo chuan hmasawnna tluantling a awm tak tak lova, Mizoram ah cancer natna vei an lo tam ta viau mai te, zuk leh hmuam bakah zu vanga talbuai Mizo thalai zingah an tam ta lutuk chu Mizo mipui te tan ngaihmawh a hun a ni a ti. An inleng, Pu David Zohmangaiha leh Nl. Lalrintluangi te hnenah ngenna siam in an thalai pui te hnenah hriselna pawimawh zia nasa zawk tlangau pui turin a chah a ni.