Governor Vakkom Purushothaman chuan vawiin khan Aijal Club-ah Mizoram Literature and Language Teachers Academy leh Department of Mizo, MZU buatsaih nithum (9th-11th November) awh tur ‘National seminar-cum-Workshop a hawng.

He seminar hi Mizo Novel-in kum 75 a tlin lawmna ni pahfawma buatsaih a ni a, Mizo novel chhuak tawhte leh a kaihhnawih thlalak phochhuah a ni a, hei hi Prof Kedutso Kapfo, Director, Central Institute of Indian Language, Mysore in a hawng.

Governor chuan vawiin hi Mizo thawnthu kum 75 tlin, Platinum Jubilee hi ni lawmawm leh chhinchhiah tlak a ni, a ti a. Indian literature tobul chhuiin Governor chuan ram chhunga thu leh hla hrang hrang kan neih te hi tawngka a inhrilhchhawn, ziaka vawn thlip thlep an ni lova, chutiang bawkin Mizo Literature hausa tak hla leh thawnthu thahnem takte hi pipu atanga inhrilhchhawng in tun hun hi an thleng thei a ti. A humhalh leh chawinun zelna tura mi thahnemngai ten hma an la hi a lawmawm takzet a ni Governor chuan a ti bawk.

Governor chuan Seminar bakah nikhat ( 11th November) awh tur Orientation Workshop neihchhun zawm tur sawilangin tun dinhmun ah University Grant Commission chuan zirtirtu te a duhtui sawt hle tawh a. An hnathawh dan anmahni in an tarlan thin aiin an zirlai ten an hmuh leh an hriat dan in nasa takin ko ri tu dawn tawh a. Chuvangin a bik takin tawng leh literature zirtirtu tan phei chuan class chhung mai bakah nasa lehzuala tan an lak a tul anga, he Orientation Course hi an hman tangkai ngei a duhpui thu Governor chuan a tarlang a ni.

Governor hian lehkhabu tlangzarhna hun a hmang a, a lehkhabu tlangzarh te chu :- World Literature & Capt. L Z Sailo by Dr Laltluangliana Khiangte; A Professor’s Padma Shri by Isaac & Sangzuala; Rammawi Kalkawng & Duhtak Sangpuii by Khawlkungi; Mizo Chanchin & Petera Hrilhfiahna by Rev Liangkhaia.

National Seminar hawnna inkhawm hi Prof. Laltluangliana Khiangte in a kaihruai a. Naktuk November 10 hian kharna inkhawm hi Chief Minister Pu Lal Thanhawla’n a hmanpui ang.