Vawiin ah khan Governor Lt.Gen(Rtd.) Nirbhay Sharma chuan Trained Nurses’ Association of India, Mizoram Branch (TNAI) in an pawl din champha phak vawi 50-na puala lawman programme, kum in kumtir lam atanga an lo tan tawh, kharna hun chu Synod Conference Hall ah a hmanpui.

TNAI din champha vawi 50-na lawmpuina thu sawiin Governor chuan thiamna sang chho zelah pawh Nurse te’n tihdam leh damlo enkawl rawngbawlna an kalpui mek hi hmanraw hran leh thiamna thar in a thlak thei dawn chuang lo a ni a ti a. “Nurse hna hian science thiamna mai a duh khawp lova, mahni mihring pui te harsatna leh damlohna chi hrang hrang te hriatthiamna, hmangaihna leh puih duhna thinlung enkawl theihna a mamawh tel a. Rinawmna bakah mahni hna a inpekna thuk ber neitu in nih pawh a ngai tel a ni. Damlo damdawi hmanga enkawl mai duhtawk lovin an rilru thawidamna thleng in in hna ah hian a awm tel a. In hnathawh hi a chang chuan hautakin khirh bawk thin mahse, mi mangang ten an bula in awm ringawt vangin thlamuanna an nei thin tih inhriat chuan in thinlungah lawmna a awm ngei ngei ang tih ka ring a ni. Chu aia lawmman ropui a awm bik chuang lova, khawngaihna, hmangaihna leh midang ngaihsakna te hi miten in nitin hnathawh a an hmuh thin thil ropui ber ber te an ni. Nurse hnathawk te hi midang te taksa, rilru leh thlarau harsatna bakah hreawmna te thawidam sak theitu, vohbik in ni ti in hre reng rawh u”, a ti a ni.

Pawl hmalakna reng reng ah mi thenkhat hruaitu nih tlin, hmathlir thui, mi tumruh ,tuarchhel, pawl nawrkaltu an awm a ngai thin tih sawiin pawl chak takah in tel chhunzawm a, in chawk phur tawn zel turin TNAI member kalkhawm te chu a fuih a. “Mizoram chhunga Nurse zir chhuak tam tak in state pawn lam leh rampawn thleng in hna in hmu tih ka hriat hian ka chhuang che u a. He hlawhtlinna ah hian TNAI, Mizoram Branch in fak an phu hle in ka hria. Ka lawm pui che u. He hun ah hian thil pawimawh tak sawichhuah remchang hle in ka hria a. Chu chu Hindi, English leh nurse ten thiam tum ula, in hna hmuhna hmun cheng te tawng in lo thiamlawk pawh a tul hle a ni. Tawngthiam leh tawng inhriatpawh tangkaina leh pawimawhna chu sawi pawh ngai lovin in hriat vek ka ring” a ti a ni.

TNAI Mizoram Branch Golden Jubilee kharna inkhawm hi, Pi Lalfamkimi, President, TNAI, Mizoram in a kaihruai a. He hunah hian, TNAI tana sultutu lo ni reng tawh thin Pi V.Zochami, jubilee Kharna puala khualzahawm chuan TNAI, Mizoram Branch Golden Jubilee Souvenir a tlangzarh in nurse rual te hnenah fuihna thu a sawi a. Governor Nupui Pi Jyotsna Sharma in TNAI hruaitu hlun lo ni thin te hnenah chawimawina thuziak a hlan bawk a ni.