Vawiin tlaiah khan Mizoram Governor Lt.Gen(Rtd.) Nirbhay Sharma chuan Prominent Journalist Robert Lal Chhuana (Fam) chhungte chu an chhungkaw chenna in Sihphir ah tlawh in a ral.

Pu Robert Lal Chhuana (Fam) nupui Pi C.Hmingliani leh a fa te’n  Governor  Lt.Gen (Rtd.) Nirbhay Sharma hi lo dawngsawngin an chhungkaw chanchin leh Pu Robert-a chanchin te an lo hrilh a. Governor chuan  Pu Robert Lal chhuana thihna ah hian dikna tantu, mi taima leh entawn tlak  Mizoram in a chan a ni tiin  a ui thu a sawi a. A kuthnu leh sulhnu ropui a tih thu sawiin a chhungte bakah Mizoram journalist te’n  Pu Robert-a hnathawh an chhunzawm zel a ngai a ni a ti. Chanchinthar kaltlanga mipui te tih bengvar leh zirtirna piah lamah vantlang nun siamthatna kawngah leh sawrkar  khalh ngilna kawngah Mizoram journalist ten tihtur pawimawh tak an nei a. Chanchinbumi te chu  ram leh mipui tana thaber tur dah pawimawh ber a an mawhphurhna  hrang hrang te pawh tan bik neilo leh huaisen takin an kalpui zel mipui in an beisei a ni a ti.