Tukin dar 10:30 a.m hian Lawngtlai Vengpui Playground ah Republic Day vawi 67 na hlawhtling taka lawm a ni a, Bawrhsap Pu J. Hmingthanmawia chu khuallian niin hnam puanzar a pawt pharh a, hnam puanzar chibai buktu Parade Contingent 13 te chibai a chhanglet.

Thusawiin Pu J. Hmingthanmawia chuan, mipuite thlan sawrkar a awm zel theihna tura India ram kalphung tha tak chu fakin, sawrkar laipui atanga Village Council thlenga mipuiten an hruaitu an thlanchhuahna ram a nih avangin he rama cheng mipuite hi kan vannei hle a ni, a ti.

Lawngtlai District chhunga sawrkarin hmasawnna hna a thawh hrang hrangte tarlangin khuallian chuan, tunah hian Lawngtlai Civil Hospital OPD chu hawn theih tepa ni tawh a, khum 50 awm theihna tur Hospital Building pawh sak tan a ni thuai ang, a ti. Lawngtlaiah tui a harsat thin avangin sawrkar chuan Greater Water Supply Project a kalpui mek a, hei pawhin tui pump chhin tawh niin reiloteah hman theih a ni dawn a, kum 2040 thleng hneh taka Lawngtlai chawmzo tura duan a ni, a ti. Kaladan Multi Modal Transit Transport Project pawh tunah hian chak taka hna thawh mek zel a ni a, Mizoram chhung bikah 62.02% thawh zawh tawh a ni, tiin he kawngpuiin Lawngtlai District a paltlang chu kan tan vanneihna ropui tak a ni a ti bawk. Chenna in neilote tan kum 2015-16 chhung atan mi 95 tan hmuh sak an ni thu te, District chhunga naupang zawng zawngten Vaccine an lak theihna tura hmalakna te, Police Department tihchangtlunna atana hmalakna te bakah District Council kaltlanga sawrkar hmasawnna hna hrang hrang thawh mekte a tarlang tel bawk.

Hengte bakah hian Mizoram Sawrkar Flagship Programme, NLUP hnathawh dan a sawi bawk a, tunah hian 3&4 Phase kalpui mek niin he Phase atanga NLUP tanpuina pekte chuan tunah Second Instalment an dawn mek thu a sawi a ni.

Khuallian hian Republic Day lawmna Parade Contingent tithate hnenah leh he ni puala District huap Volleyball intihsiaknaa lawmman dawngtute hnenah lawmman semna a nei nghal a, tlai lamah sawm bikte pualin At Home Tea Party a buatsaih bawk.

Vawiina Republic Day hmanna inkhawmah hian sawrkar hnathawkte, zirlaite, tlawmngaipawl hruaitute, kohhran hruaitute leh sawm bikte an tel tha hle a, khawtlang mipui thahnem takin an tawiawm bawk a ni.