Vawiinah khan ram chhung hmung dang te ang thovin Mizoram khawpui lian deuh deuhvah te chuan Government of India Act 1935 thlaktu, India Danpui( Constitution of India) hman a nih tan ni champha vawi 67-na chu khunkhan taka lawm a ni. He ni puala vantlang inkhawm liantham ber chu tukin ah khan Aizawl Lammual ah neih a ni.

Zing dar 9:00 ah khan Lammual a Hnam Puanzar inphun chu Mizoram Governor Lt.Gen(Rtd) Nirbhay Sharma chuan pawtpharh in Aizawl khawpui a Republic Day 2016 lawmna inkhawm hi tan a ni a. Parade contingents te endik hmasa in Hnam Puanzar zahna chibai rawn buktu parade contingent 26 te a chhan let hnu ah Governor chuan Republic Day champha vawi 67-na pual in thuchah a sawi a ni.

Governor chuan Republic Day leh kumthar chibai Mizoram mipui te a buk a. Mipui thlantlin sawrkar rorelna hmun India chu ram ropui tak a ni tih tarlangin ram neitu rilru pu chhunzawm zel tur leh ram inrelbawlna Danpui zawmtu, venghimtu leh tichaktu ni tur in Mizoram mipui te a sawm a. Khua leh tui te tana ram inrelbawlna danbu duansak a zahawmna siamsaktu leh zalenna sualchhuahsaktu te hriatreng leh chawimawi chu ram mipui te mawhphurhna a ni a ti.

Governor chuan kum liamta ah khan Mizoram ah hmasawnna tam tak hmuhtur a awm tiin chung zinga langsar zual te a tarlang a:

State ralmuang ber nihna hauh chu thil awlsam a nih loh thu Governor chuan sawiin Mizoram ah remna leh muanna a awm theihnan sawrkar in theihtawp a chhuah thu a tarlang a. " State ralmuang ber kan nih theihna chhan lian tak pakhat chu tlawmngai pawl leh kohhranmi ten tha taka sawrkar an thlawp thin vang a ni a. An inpekna nasa tak avangin an chungah thinlung takin lawm thu ka sawi a ni", a ti. Dan leh hrai lekkawhtu, Mizoram Police te chu modernisation of Police Forces hmalakna hnuaiah ralthuam changkang zawk leh an mamawh hmanrua te nen thuam that mek an nih bakah Aizawl khawpui venhim nan kawtthler lun lai te chu CCTV hmanga vil a nih tawh thu sawiin hun reilote chhungin police outpost zawng zawng te CCTNS network hmanga thlunzawm vek an ni dawn a ti.

Zirchianna neih a nih hnuah Mizoram Flagship Programme , New Land Use Policy(NLUP) chuan rah duhawm tak a chhuah mek zel tih a tarlang a. " Kan state in sum leh pai a thawhchhuak zawng zawng te punna chu 8.45% a ni a. Hei hi India ram pumpui huap aiin a tha zawk a ni tih The Mizoram Economic Survey, 2014 - 2015 a tarlang a. Thil lawmawm tak a ni. Ramngaw ti chereu thin tu, thingtlang loneih pawh 21% laiin a tlahniam a, he thil hi, NLUP hmalakna kaihhnawih leh a hlawhtlinna tichiangtu ni in ka hria", ti in NLUP hmalakna in Mizoram sum leh pai dinhmun a chawikan a beiseiawm thu a tarlang.

Hmasawnna ruhrel indin nan kawngpui tha leh kawlphetha chakna hniang hnar zawk mipui te tana siam sak turin sawrkar in nasa tak in hna a thawk zel dawn a ni ti in hna thawh zawh tawh leh hmachhawp te Governor chuan a tarlang a. Sawkar kum, 2015-16 chhung in National Highway 54 chu Double Lane ah siam a ni a, kawngpui KM 1885 a thui sial tawh niin Km 99.83 zeta thui, Kaladan Multi Modal Transit Transport Project (KMMTTP) siam hna leh Lengpui Airport tih changtlun hna pawh thawh zawh thuai tum a ni a ti. Kawlphetha chakna siamchhuah kawngah kan state sawrkar chuan intodelh mai duh tawk lovin hralh chhuah tham siamchhuah a tum thu a sawi a. 60 MW pechhuak thei Tuirial Hydro Electric Project chu kumin ah hman theih beisei a ni a ti a. Tuivai Hydro Electric Project (210 MW) leh Hydel Project tenau zawk te pawh sawrkar hmachhawp pawimawh zingah a tel tih a tarlang.

State mipui te kham khawp tuithianghlim chhawpchhuah chu sawrkar intiamna a nih angin tih hlawhtlin thuai a ni dawn a ti a. Water Supply Schemes projects 21 lai chu Non-Lapsable Central Pool of Resources (NLCPR), 10% Lumpsum Grant leh North Eastern Council (NEC) atanga hnathawhna sum hmuh tawh te hmang in peih fel thawkhat a ni tawh thu leh kum 2015-16 chhung ngei a thingtlang khaw 42 ah te National Rural Drinking Water Programme (NRDWP) kaltlang a tuithianghlim sem hman a nih theih nana hmalakna te a tarlang bawk a ni.

Rampumpui huap Flagship Programme, Swachh Bharat Mission chu mipui vantlang hriselna kawnga tangkai tak a sawrkar in a dah pawimawh a ni a ti a. Sikul ah te zunram thiarna mumal tak sawrkar in sa mek zel a, bawlhhlawh chi hrang hrang te mipui zawk him nan awmze nei zawk a sawngbawl tum a nih thu a tarlang. Damlo enkawlna man tlawm, damdawi leina leh damlo enkawlna senso tlem zawk mipui te tan buatsaih a ni dawn a. Mizoram Institute of Medical Education & Research (MIMER), Falkawn a din , Mizoram State Cancer Institute, Zemabawk a kan neih mek hi khum 100 awmna Cancer Hospital ah siam, Khum 200 awm theihna tura lian, Mizoram College of Nursing, Falkawn sak hna , 50 awm theihna AYUSH Hospital, Thenzawl a sak mek leh damlo enkawlna huang chhunga sawrkar hmalakna te chu uluk taka vil mek niin tih puitlin thuai beisei a ni a ti.

Mi rethei leh khawsak harsa deuh chhungkaw 1,096 lai ten chenna tur JNNURM hnuaiah sak mek niin thingtlang a cheng mi rethei te leh khawsak harsa zawk te chawikanna atana sawrkar hmalakna kal mek : Mahatma Gandhi National Rural Employment Gurantee Scheme (MGNREGS), Indira Awaaz Yojana (IAY), National Rural Livelihoods Mission (NRLM), Pradhan Mantri Krishi Sinchayee Yojana (PMKSY) leh Border Area Development Programme (BADP) te pawh tha taka kalpui mek a nih Governor chuan a tarlang a. Buh leh bal a intodelh nan leh kan buh thar chhuah te ti pung turin tunlai thiamna rintlak tak tak : System of Rice Intensification (SRI), Line Planting leh tlang pang a buhhmun neih dan hlawk thlak zawk te loneitu te zirtir in mithiam ten theih tawp an chhuah mek a ni a ti a. Nitin mamawh, buhfai leh eitur pawh mipui te hnena rual khai zawka sem hna kalpui a ni tawh a. Ration Card zawng zawng computer ah felfai taka chhinchhiah ni tawh in Food Security Act, 2013 pawh hman thuai a ni ang a ti.

Thalaite thiamna pek leh eizawnna kawhhmuh chu hmasawnna ruhrel pawimawh tak a nih avangin sawrkar chuan Human Development ah hma a la nasa tih a sawi a. Khaw 66 ah Early Childhood care and Education (ECCE) din tawh niin Rastriya Uchchatar Shiksha Abhiyan (RUSA) hmalakna hnuaia College 21 tih changtlun, Govt. Zirtiri Residential College leh Govt. Hrangbana College te Model Degree Colleges a hlan chhoh bak ah Mizoram Engineering College, Pukpui, Lunglei siam rawtna te Ministry of Human Resources Development, Govt. of India chuan a pawm tawh a ni a ti.

Chak zawka hmasawn turin inthlun zawmna chi hrang hrang bakah digital connectivity a pawimawh hle a ni a ti a. Nakin lawkah Kaladan Multi Modal Transit Project chuan ‘Act East Policy’ chu a tak ram rawn chantir in hmana Outpost anga ngaih theih, Mizoram chu “Gateway of India” ah thlak in South East Asia ram te rawn luhna tur lamliam a ni tawh dawn a ni a ti a. The Land Customs Station, Zokhawthar chuan nasa takin Myanmar leh India insumdawn tawnna tunah pawh a tipung hial tawh thu sawiin Land Custom Station (LCS), Zorinpui, Lawngtlai District sak hna pawh ngawrh takin kal pui mek ni in hun reilote chhhunga thawh zawh hman beisei a ni a ti.

Hmasawnna ruhrel din kawngah Mizoram nasa takin a thang mek a, Bamboo Sector Development, Electronics & IT Sector, Handloom & Handicrafts leh Skill Development Training ah hlawhtlinna tam tak hmuh tur awm in leilung hauhsakna zawn hna pawh Oil & Natural Gas Commission (ONGC) leh Oil India Limited (OIL) company ten chak takin an kalpui mek a ni a ti. Adventure Tourism, Rural Tourism leh Eco-Tourism ah te Mizoram hian hlawhtlinna a hmu thei tih zirchian a ni tawh a, hun reilo te chhungin India Tourist Map ah Mizoram chu a chuang ve thei tawh dawn a ni tiin khualzin hiptheihna hmanrua Mizoram in a neih thu a tarlang a .Prime Minister Pu Narendra Modi-a hmathlir - "India ah bul tan rawh" tih leh "India dinchhuah pui rawh" tih rilru a dah in thiamna bik kawl Mizo thalai te chu pen chhuak turin Governor chuan a sawm a. " Mizo thalai te hi "hnazawng" ni lovin "hna siamtu" ni thei khawp a theihna nei an ni tih ka chiang em em a ni", a ti. Infiamna khawvel a Mizo thalai ten Kum 2014-2015chhung khan National Level intihsiakna ah Gold Medal 50, Silver Medal 55 leh Bronze Medal 76 hlawhchhuak in Mizoram Under-14 Football Team phei chuan Kum 2015 Subroto Cup International Tournament ah Champion in Mizoram ah Champion No Mawi an rawn hawn hial a ni ti in Mizo thalaite hlawhtlina chu ropui a tih thu a sawi a. Sawrkar in thalaite tana khawvel thar a siam sak chuan nasa takin Mizo thalaite a ti hmasawn mek a, nakin lawk ah chuan India ram hmahruaitu an la ni dawn a ni a ti.

"A tawp berah chuan kan Mizoram mipui ten beng lo khawn lehzual se ka duh chu Mizoram leh Himalaya tlang bul thut a awm state zawng zawng te hi khuarel chhiatrupna chi hrang hrang lakah kan him lo mai ni lovin kan dinhmun a thlamuan awm lem lova. Hmanni a Manipur a chhiatna lo thleng ang leh a aia nasa zawk pawh kan kan tawk thei a ni tih hi chiang ila, Sawrkar in mipui te disaster drill chungchang a zitirna a pek te hi thlir liam lovin ngaihven thin ang u. Sawrkar in kan him tlan zawk na tura insak kalphung a siam te hi kan thatna tur a ni ti hria in zawm tlat i tum ang u. Mahni sahimna kawng ngaihtuah chungin mi dang te tanpui leh chhanchhuah dan pawh kan zir tel a ngai a. Chu chu ‘Smart City’ Mission for Aizawl atan a kan lo inbuatsaih lawkna pawh a ni thei ang", a ti a.

Kan zavaia hriat reng atana ka duh chu, thawhhona awmlohna ah hlawhtlinna a thleng thei lo tih hi a ni a. Tichuan, kan rilru put hmang siam tha in keimahni a thil thalo awm thei chi hrang hrang – khawhawi zau lohna, khawzuamlohna, hlemhletna leh vantlang tana thiltha zahlohna te zawng zawng I dahbo vek ang u.

Lammual a Republic Day lawmnaah hian Chief Minister Pu Lal Thanhawla bakah Minister, Parliamentary Secretary, MLA, official, zirlaite leh mipui thahnem tak an tel a. Parade contingent titha te leh he ni puala infiamna chi hrang hranga lawmman dawngtute hnenah Governor chuan lawmman a sem bawk a ni. Lammual a lawmna inkhawm zawhah hian Circular Lawn, Raj Bhavan-ah sawmbikte tan Governor chuan thingpui ruai a lo buatsaih a ni.