2855/2024-2025

Dated Aizawl, the 5th November 2024: Mizoram Governor Dr. Hari Babu Kambhampati chuan zanin dar 7:00 khan khawvel sik leh sa inthlak danglam mek zel kara boruak thianghlim leh hrisel neih pawimawhna auchhuahpuia India ram State 28 leh Union Territory 5 te Thirsakawr hmanga tlawh chhuaktu Pu Vanlallawmzuala Varte (Lz Varte), Mission Veng, Aizawl hmuahna leh lawmpuina hun Banquet Hall, Raj Bhavan-ah a buatsaih a, Governor hian a lawmpui zia lantir nan memento leh sumfai Rs 10,000/- a hlan a ni.

Mizoram Governor Dr. Hari Babu Kambhampati chuan thuchah pawimawh tak kenga Thirsakawr hmanga inkhalha India ram State 28 leh UT 5 te fanga zirtirna petu Pu Vanlallawmzuala Varte inpekna leh taimakna chu chhuanawm a tih thu sawiin, dam leh hrisel taka Mizoram a lo let leh chu lawmawm a tih thu a sawi a. Chak tak maia sik leh sa a inthlak danglam zel chu veiawm a tih thu leh inzirtirna zau zawka kalpui a tul takzet thu sawiin, boruak thianghlim neih pawimawhna inzirtirna campaign hmanga Pu Vanlallawmzuala Varte thuchah leh zirtirna kente chuan rah tha a chhuah ngei a beisei thu a sawi a ni.

He hunah hian  Pu Vanlallawmzuala Varte chuan All India Tour a neih chhunga a hun tawn leh harsatna paltlang hrang hrangte Governor hi hrilhin, a kalna hmun hrang hranga mipuite leh Official-te thlawpna a dawn avangin lawmthu a sawi a. A hmalaknate Governor-in a hlut sak avangin lawmthu a hrilh a. A zinna atanga a thil tawn leh hriat hrang hrangte hmuh theih tura dahkhawmna lehkhabu a hlan a ni.

Pu Vanlallawmzuala Varte hian Mizoram Pollution Control Board (MPCB) bultumin Mission Life hnuaiah ‘Ride to Clean Air & Sustainable Lifestyle' tih thupui hmangin India ram State 28 leh Union Territory 5 te Thirsakawra inkhalhin a tlawh chhuak a; a thlen chin apiangah lawm a hlawhin Pollution Control Board-te nen boruak thianghlim awm theihna tur leh a pawimawhnate an sawi ho thin a ni.

All India Tour tur hian January ni 25, 2024 khan Aizawl a chhuahsan a, ni 281 zet a thang hnuah October ni 31, 2024 khan Vairengte a lo thleng a. Aizawl hi a ni 286 naah rawn thlengin km 17043.1 inkhalh anga chhinchhiah a ni a, chawhrualin nitin darkar 10.29 inkhalhin km 83.54 a thui thleng pha zel anga chhinchhiah a ni.