2856/2024-2025
Aizawl, November ni 5, 2024: Vawiin khan Aizawl District huamchhung a Sinlung Hills Council area ah General Election to Sinlung Hills Council, 2024 vote thlak ni (Poll Day) chu boruak muanawm tak hnuaiah neih zawh a ni.
Aizawl District huamchhung a Sinlung Hills Council, 2024 inthlanna vote thlakni (Poll Day) hi Aizawl District Deputy Commissioner leh District Election Officer ni bawk Pu Er. Lalhriatpuia leh Pu Samuel Zodinsanga, Election Officer Aizawl ten District Control Room, Deputy Commissioner's Office, Aizawl atangin uluk takin an vil reng a; Sinlung Hills Council huamchhung a inthlanna neihna khua ah te hian Aizawl District Election Observer Pu James Lalrinchhana, Pu Mark Lalthanliana, Dy. District Election Officer, Pu Rahool Alwal, Superintendent of Police, Aizawl leh Pu Zoramthara, Addl. SP (Crime) Aizawl te chuan awm chilhin inthlan zawh thleng boruak tha leh muanawm tak a awm theih nan khaw hran hran te an tlawh kual a, Sinlung Hills Council 2024 inthlanna ah hian boruak muanawmlo leh thil duhawmlo thleng a awmlo a ni.
General Election to Sinlung Hills Council, 2024 inthlanna a vote tla te hi Constituency tina Counting Centre ruat bikah Returning Officer te kaihhruaina hnuaiah Dt. 5.11.2024 zan lamah chhiar nghal a ni dawn a ni.
Vawiin a Sinlung Hills Council, 2024 inthlanna a vote thlak hun chhung State Election Commission in a ruat hi zing dar 7:00 AM atanga tlai dar 4:00 PM thleng a ni a, mahse vote thlak hunchhung tura ruat ah hian vote thlak zo hmanlo Polling Station an awm nual a, Polling Station vote thlak na hnuhnung ber hi 8-Sakawrdai 'N' Constituency a Sakawrdai-I Polling Station niin zan dar 7.20 PM ah vote hi thlak zawh a ni.
Aizawl District huamchhung a Sinlung Hills Council, 2024 inthlanna ah hian Constituency 6 (paruk) awmin Polling Station 19 (sawmpakua) a awm a, vote tlak thatna ber hi Lungsum Polling Station a ni a, 80.44% vote a tla a, vote tlak hniamna ber hi Vaitin Polling Station niin 63.46% vote a tla a ni. Polling Station 19 atanga vote tla zawng zawng hi vote 7766 a ni a,vote awm zat zawng zawng hi 10799 niin vote tla percentage hi 71.91% a ni.
