2854/2024-2025

Aizawl dated 5th November 2024: Ni 286 chhung a State 28 leh Union Territories 5, Cycle hmang a paltlang a, boruak thianghlim a awm theih nana boruak tha lo tihtlem pawimawhna auchhuahpuitu, Pu Vanlallawmzuala Varte chuan vawiin chawhnu khan Durtlang a rawn thleng a. Pu C.Lalduhawma, Member Secretary, Mizoram Pollution Control Board kaihhruaina hnuai ah MC Hall, Durtlang, Aizawlah lo hmuahna hun buatsaih a ni.

He hun ah hian Pu Vanlallawmzuala Varte chuan All India Cycle Tour tipuitling tura a zin kawng a harsatna leh chona hrang hrang a hmachhawn dan te sawiin State hrang hranga Pollution Control Board-a thawktute lo buaipuina te, missionary-ten an lo dawnsawn dan leh Sawrkar laipui hnuai a hmun hrang hranga hnathawk a awm ten nasa takin a tul ang anga an lo buaipui thinna chu a tangkaipui thu a sawi a. Amah tawngtaipui a ngaihventute leh duhsaktute zawng zawng chung ah lawmthu a sawi bawk a ni. 

Pu Franklin Lalrinngheta, President, MiCA pawhin Pu Vanlallawmzuala Varte tumruhna leh thahnemngaihna fakawm a tih thu sawiin a thupui ken,’Ride to Clean Air’ chuan a tak a awmze thui tak a neih ngei a beisei thu a sawi bawk a ni.

MC Hall, Durtlangah hian tlawmngai pawl, NGO, Environmental Activist leh pawl hrang hrangin chawimawina thilpek an hlan a ni.

Pu Vanlallawmzuala Varte, Mission veng, Aizawl hian January ni 25, 2024 khan ‘Ride to Clean Air’ All India Cycling Tour for awareness campaign on clean and green sustainable lifestyle under Mission Life, Mizoram Pollution Control Board nei tur hian Aizawl atangin a inkhalh tan a, ni 281 a thang hnu ah, October ni 31 khan Vairengte a lo thleng leh ta a ni. Aizawl a lo luh thleng hian km 17043.1 inkhalh anga chhinchhiah a ni a, chawhrualin nitin darkar 10.29 inkhalhin km 83.54 a inkhalh a ni. A inkhalh chhuah tan atanga vawiin thleng a State hrang hrang leh Union Territories a paltlangte chu;

January: Mizoram, Tripura (528.58 km)

February: South Assam, Meghalaya, Assam, North West Bengal, East Bihar, 

Jharkhand, West Bengal and Odisha (2,609.56 km)

March: Chhattishgarh, East Maharashtra, Telangana, Andhra Pradesh, Tamil Nadu and Karnataka (2,625.97 km)

April: Central & Southern tip - Tamil Nadu, Kerala, 

Western Coastal Karnataka, Goa and Maharashtra (2,269.73 km)

May: Maharashtra, Gujarat, Madhya Pradesh (1,825.62 km)

June: Rajasthan, Haryana-Delhi (NCT-UT), Punjab (Chandigarh-UT), J & K (1,151.21 km)

July: J & K (UT), UT of Ladakh, Himachal Pradesh (1,464.45 km)

August:  Himachal Pradesh, Uttarakhand, Uttar Pradesh (1,708.71 km)

September: Uttar Pradesh, Bihar, Sikkim, Assam (1,273.69 km)

October: Assam, Arunachal Pradesh, Nagaland, Manipur, Mizoram (1407.52 km)

November: Mizoram (134.02 km)

Durtlanga Pu Vanlallawmzuala Varte hmuahna hmun ah hian Mizoram Pollution Control Board hotute, Mizoram Cycling Association member-te leh Durtlang Leitan leh Mission Veng Branch YMA member thahnem tak an tel a. MiCA kaihruaiin Cyclists engemaw zah nen Durtlang leitan atang hian Mission veng panpui a ni.