2853/2024-2025

Saitual, the 5th November 2024: Tukin zing dar 7:00 atanga tlai dar 4:00 thleng khan Saitual District chhunga 2nd General to Sinlung Hills Council inthlan 2024-ah tluang taka vote thlak a ni a, Saitualah hian candidate 17 awmin constituency 4 leh polling station 12 a awm a ni.    

Sinlung Hills Council inthlan vawi hnihnaah hian bial 12 a awm a, chung zing atang chuan Saitual District huam chhungah bial pali, Khawlian, Phuaibuang, Suangpuilawn leh Vanbawng awmin, heng bial pali atang hian Candidate 17 ten Council seat an chuh a, Khawlianah candidate 6, Phuaibuang leh Suangpuilawn ah 4 ve ve awmin Vanbawngah candidate 3 awmin an tlem ber a ni.  

Constituency 4 zingah hian 2-Phuaibuang constituency ah vote 1295 (mipa-676 ; hmeichhia-619 ) tlain, chu chu 74.25% a ni a, vote tlak thatna ber constituency a ni.  1-Khawlian constituency ah hian vote 1535 (mipa-822 ; hmeichhia-713) tlain, chu chu 64.17% a ni a, vote tlak chhiatna ber a ni thung. Polling station 12 zingah 3/3-Zawngin Polling Station-ah vote 394 (mipa-207 ; hmeichhia-187) tlain, chu chu 77.10% a ni a, vote tlak thatna ber polling station a ni. 1/3-NE Tlangnuam Polling station ah vote 274 (mipa-136 ; hmeichhia-138) tlain, chu chu 56.96% a ni a, vote tlak chhiatna ber polling station a ni thung.  

Sinlung Hills Council-a ballot paper hmanga vote thlak a nih hnu hian polling party te chuan an counting hall theuh an pan a ni.