Vawiin khan Mizoram Governor Pu Kummanam Rajasekharan chuan St. Pauls Higher Secondary School, Aizawl-a ni hnih awh tur science and mathematics fair – SCIENTICS 2018 a hawng a ni. 

Pu Kummanam Rajasekharan chuan kan nitin nunah Science leh Technology hian hmun  pawimawh a chang chho zel a, science leh mathematics kan hmanna pawh a sang zel a ni, a ti a. He exhibition hian  zirtirtu leh zirlaite inkarah thawhhona thatak siamin an theihna leh tawnhriatte inhrilhhriatna hun remchang tak a ni, a ti. Zirna chu hmanraw tangkai taka hman a duh thu sawiin, science leh technology chuan khawtlang tana hmasawnna awmze nei tak, thlentu nise a duh thu a sawi a ni. Governor chuan kan ram chu vawiina zirlai naupang - a ngaihna hria, midangte nena thawkho thei, mi tumruh leh harsatna kara ding chhuak thei te kutah a innghat a ni, a ti a. Khawtlang leh ram tana theihtawp chhuah zel turin a fuih bawk a ni. 

Principal Rev. Bro. Dr. TJ Jose pawhin thu sawiin, technology hmasawnna leh hlawhtlinnaah kan innghat nasa chho zel a, khawvelin harsatna hrang hrang a hmachhawn mek – sik leh sa inthlak, eizawnna siam, ram ei bar harsatna, energy mamawhna pung chho zel te, artificial intelligence leh robotics te hian science leh mathematics lama hriatzauna thui tak a mamawh a ni, a ti. SCIENTICS 2018 chuan zirlaite rilruah chung harsatna hrang hrangte chu engvanga thleng nge a nih tih hriat chaknate, a tikiang thei tura hma lak duhna rilru tuh a tum a ni, a ti a. Chu chuan chik taka a chhanna zawnna, research leh thil hmuh chhuah te, a ngaihna hriatna a thlen ang a, kan hmalam hunah khawtlang tana hmasawnna a thlen dawn a ni, a ti. 

Khullian chuan he hawnna inkhawm zawhah hian exhibition-a thil pholan te chu enkual in, zirlaite nena inkawmna an nei nghal a ni.