Vawiin khan Governor Kummanam Rajasekharan chuan Motherless Babies’ Home, Khatla leh Zonunsang Handloom, Chhinga Veng a tlawh.

Motherless Babies’ Home, Khatla hi Mizo Hmeichhe Tangrual te’n an enkawl a. Integrated Child Protection Scheme hnuaia kalpui a ni a. Governor hi Mizo Hmeichhe Tangrual member-te leh Motherless Babies’ Home thawktu ten an lo lawm a. Governor chuan thu sawiin hlawkna ringawt um lova midang tana hun tam zawk petute chu an chhuanawm hle a ni, a ti a. Mizoram hmun hrang hrangah nau hnuchham in a awm nual thu sawiin tlawh zel a tum thu a sawi a. Motherless Babies’ Home, Khatla tlawhna hun tha tak neih a ni chu lawmawm a tih thu a sawi a. Naupangte hian rilru thianghlim an pu a, an bula awm pawh a hlimawm em em a ni, a ti a.  Nau hnuchham enkawlna kawngah hna a lo thawh tawh thin thu sawiin hemi kawnga hmalaknate leh thawktute chu fakawm a tih thu a tarlang tel a ni.

Mizo Hmeichhe Tangrual President Pi C Dailovi chuan Motherless Babies’ Home din a nih dan leh Mizo Hmeichhe Tangrual hmalakna hrang hrang a tarlang a. Vice President Pi Lallawmzuali chuan Governor Kummanam Rajasekharan chu Mizoram Governor zinga Motherless Babies’ Home, Khatla tlawhtu awmchhun a nih thu sawiin lawmawm a tih thu a sawi a. A  kal zelna turah duhsakna a hlan a ni. Motherless Babies’ Home, Khatla hi kum 1969 khan hawn a ni a, tunah hian naupang 10 an enkawl mek a. Home staff 5 leh Office staff 5 an awm a ni.

Vawiin vek hian Governor Kummanam Rajasekharan chuan Zonunsang Handloom, Chhinga Veng a tlawh a. Zonunsang Handloom neitu Pu Zohmangaiha te chhung nen inkawm hona tha tak an nei a. Mizo puan hrang hrang te, an puan design te leh kutchhuak mawi tak tak en hona hun an nei a. Hemi hnu hian puan tahna khawl leh hmanrua an en leh a. Khawl thawhdan leh puan tahdan thlirhona hun neih a ni. Zonunsang Handloom hi 1986 khan din a ni a. An kutchhuak hrang hrang te hi ram chhunga zawrh atan leh ram pawna thawnchhuah theih tura ruahman a ni.