Vantlang rawngbawlna  huanga  ahun tam zawk hmang thin, Mizoram Governor Kummanam Rajasekharan chuan  a hnathawh that avang te leh mipui harsatnate sukiang tura hlawhtling taka a lo penchhuah thin  avangin honorary  Doctor of Letters( D.Litt) a dawng dawn a. Governor Kummanam Rajasekharan hi a pian leh murna hmun, Kerela-ah chuan Vantlang rawngbawltu leh mipui chanvo diktak hlawhchhuak tura  theihtawp chhuah thin leh  hmaruaitu lar takte zinga mi a ni a; heng a hnathawh leh hlawhtlinnaah te hian chawimawi phu ah ngaiin  Shri Jagdishprasad Jhabarmal Tibrewala University( SJJTU), Rajasthan chuan  D.Litt(Honorary)  a pe dawn a ni.

Governor Kummanam Rajasekharan hi 1952 December ni 23 khan Kerala thingtlang khaw pakhat, Kummanam-ah a lo pianga. A nu leh pa te chu Advocate V.K. Ramakrishna Pillai leh Pi. P. Parukkutty Amma te an ni. Amah hi zirna lamah chuan B.Sc(Botany) Degree leh PG( Journalism) Diploma nei a ni a. Journalist te ni tawhin sawrkar hna te a thawh hnuah vantlang rawngbawlna huangah a hun puhlumin a inhmang chhunzawm a ni.

Shri JJT University chuan an Campus-ah nakum February leh March thla chhunga hun remchangah Convocation an buatsaih leh dawn a. He hunah hian mithiam dangte rualin  Governor Kummanam Rajasekharan hnenah hian Honorary Degree of D.Litt an hlan dawn a ni.