Nimin tlaiah khan Governor Kummanam Rajasekharan chuan Zuangtui Muanna vengah TNT Kalvari Hospital a tlawh a, Krismas thilpek a hlan nghal bawk a ni. Governor hian TNT hmunhma te tlawh kualin an inenkawl dan te a belchiang a. Hemi hnu hian TNT Chairman Dr Sangthankima , a thawhpui leh TNT chhungkua te chuan  Governor pual hian Sermon Hall-ah inkhawm tawi an lo buatsaih sak a ni.

TNT hmunhma te a tlawh a, an inenkawl leh inrelbawl dan, tanpuina an dawn dan te a zawh hnuah Governor  Kummanam Rajasekharan chuan TNT Chairman Dr Sangthankima chu a kawm a.  Tunlai khawtlang-ah leh India chhung hmun hrang hrangah te hmangaihtu neilo mi vakvai, fahrah leh mi endawng tam tak an awm mek  a. Hei hi mihring kan nihna leh kan mihring puite hmangaihna lantirna kawngah kan tihtur te kan tih thinloh vang a ni pakhat tih Governor chuan a sawi a. Chutiang khawvelah chuan Dr Sangthankima leh a thawhpuite inpekna a zarah mi sang telin chhungkua leh chenna in an nei chu thil ropui bik a ni tih a sawi a. An thiltih leh hmalakna chu Tuifinriata Lawngmite tana Lighthouse ang maiin mi zawng zawng tan Eng hmuh theih leh entawn atana mawi a ni a ti. Fahrah, Mianglo leh Ngawlvei te enkawlna hmun chu hmun thianghlim a ni a, thlarau lama malsawmna dawn duh tan pawh hetiang hmunah hian thlarau chaw a awm thin a ni a ti. TNT naupang leh Addict enkawl mekte tan fuihna thu sawiin hmalam hunah hun tha an chan theih nan duhsakna a hlan nghal bawk a ni.

Dr Sangthankima sawi dan chuan Zu Ngawlvei pakhat a enkawl hmasaber a, chumi hnuah Rilru Lama Mianglo a enkawl leh a, Fahrah enkawl chhunzawm lehin chuta atang chuan TNT chu 1988 khan din tan a ni a ti a. Tun dinhmunah TNT hian Kolasib, Champhai, Lunglei leh Tahan, Myanmar-ah te Centre an nei mek a ni. Dr. Sangthankima chuan Governor hnenah hian Pathian kohna a dawn mek thu sawiin Bangladesh-ah michuang tam tak enkawltu neilo an awm mek avangin Centre din an la hmabak tih a sawi a. China leh Myanmar ramri-ah pawh mi vakvai leh michuang tam tak an awm mek bawka hmalak a la ngai dawn bawk a ni a ti.

TNT Kalvari Hospital-ah hian Naupangte tan High School thleng a zir theih a; pawlsang zawk zir te chuan TNT pawnlamah an zir a ni. Ruihlo ngai enkawlna dawng mek, Fahrah leh hnuchham bakah Rilru lama mi pangai pha zan lo te TNT-ah hian enkawl an ni a. Mi tlawm ngai, hnathawktua inpe mipa 50 leh hmeichhia 32 ten Mipa naupang 251, hmeichhe naupang 163, rilru lama chiang lo mi 421, Ruihlo ngai enkawl mek - mipa 556 leh hmeichhia 382 te enkawl hna an thawk mek a. TNT- Kalvari Hospital-ah hian tundinhmunah rawngbawltu leh enkawlmek te belhkhawmin mi 1855 an cheng mek a . TNT a awm mipui sangtel  hian sawrkar emaw mimal hnen atangin chatlak miah lova tanpuina dawn an nei lova tanpuitu leh mi tlawmngaite  nitin an mamawh hle  a ni .