Vawiin khan I&PR Conference Hall, CHANEM Building Champhaiah, I&PR Champhai leh MJA Champhai District ten inkawmhona leh Advance Christmaas lawmna hun an hmang. 

He hun hi Dr Lallawmkima, MIS, DIPRO Champhai District chuan kaihruaiin MJA leh I&PR Department ten kum tluana thawhhona tha tak an neih avangin lawmthu a sawi a. Kumin inthlan vuakveta chanchinbumiten inthlanna muanawm leh dik awm theihna tura Election Commission of India dan siamte an zawm thaa a hriat thu leh hei hian khua leh tui tha an nih zia a tifiah a ni, a ti a. MJA Memberte chu  an pawl changvawn Service to the People tih chawinunga vuan tlat zel tur leh an rawngbawl sak mipuite tana rinawm leh taima taka thawk chhun zawm zel turin a chah a. Kum thar lamahte pawh thawhhona tha tak a awm zel theih a beisei thu a sawi bawk.

Pu C. Lalhnunpuia, President, MJA Champhai District chuan DIPRO kaihhruaina hnuaiah I&PR Department leh MJA ten thawhhona tha tak neia Champhai District chanchinbumiten hmasawnna an nei chu lawmawm a tih thu a sawi a. Sawrkar tharah kalphung thar pawh lo awm se mipuite rawngbawl sak kawngah theihtawp kan chhuah tlan zel a tul dawn a ni, a ti a. Media mite chu mipui rawngbawl sak kawngah sawrkar thawhpui tlattu nihna hre thara mahni ngaihdan mai mai nilo thudik tarlangtu nih tum tur leh ram leh hnam hmasawnna kawnga tha thawhtu  nih tum  theuh turin a chah a. Tun atanga hun reiloteah kum thar kan chuangkai leh dawna, ngaihtuahna thar, inlungrualna leh dikna hmanga hmalam pan zel tura insiamthar a ngai a ni, a ti bawk. 

Vawiin inkawmhona leh Advance Christmas hmanna hunah hian kalkhawmte atangin thusawi tawi ngaihthlak ani a. Pu Lalnunsanga Fanai, Treasurer, MJA Champhai District-in hunserh a hmanga. Pu Lalrotluanga Ralte, Executive Member, MJA  Champhai District-in lawmthu sawiin  hun a khar a. Intihhlimna hunte hmangin Advance Christmas lawmna ruai tuihnai tak an kilho nghal a ni.