Vawiin chawhma ah khan Raj Bhavan ah Governor Lt.Gen(Rtd.) Nirbhay Sharma leh Mizoram People’s Forum(MPF) hruaitute an in kawm.

MPF puipate - Rev. Dr. R.Lalbiakmawia, General Secretary, Rev. Dr. Sangthanga, Vice President leh Pu Vanlalruata, Secretary te chuan MPF lo indin dan leh an hmalakna te sawi lang in Mizoram ah sawrkar tha a awm theih nan theih tawp an chhuah zel tur thu Governor hi an hrilh a. MPF hnathawh leh mipui tana an inpekna te chhuanawm a tih thu Governor Lt. Gen(Rtd.) Nirbhay Sharma chuan a inleng te hi a lo hrilh a. MPF pawl hlawhtlinna ropui tak chungchang leh state dang tan entawn tlak a tih thu pawh inchhuang takin Chief Election Commissioner Dr. Nasim Zaidi a lo titi pui tawh tih a sawi lang a. MPF hmalakna chu India ram pumpui in Electoral Reform kalpuina atana mamawh ber pakhat a ni a ti. Mipui leh kohhran thlawpna an neih that avangin MPF hmachhawp pawimawh tak pakhat Good Governance project a la hlawhtlin a rin thu a sawi a.

Skill Development ah thalai te puih an ngai tih tarlangin Governor chuan Skill development huang a Mizo thalai te tih hmasawnna kawng dap chu tun dinhmuna hna hmanhmawh ber a nih thu lo hrilh in ruahmanna siam pui ah MPF hruaitute chu sawm ai. “ KMMTTP a puitlin huna kan thalai te an lo inpeih hman si loh chuan buaina namenlo kan tawk thei dawn a. He project zawh hma ngei hian kan thalaite hnathiam leh chhawrtlak a chher an nih theih nan MPF, CYMA leh tlawmngai pawl hrang hrang ten sawrkar an thawhpui a ngai”, a ti a. Governor chuan Mizoram ah hmasawnna hmanrua leh mamawh a awm kim deuh thaw a, rilru inhawn zau leh midang te thawhpui thiam erawh Mizoram in a hmabak pawimawh tak a ni a ti in MPF hruaitute chu hun dangah Mizoram kalsiam leh thalaite hmakhua tur ruahman pui ah a lo sawm a ni.