No.7871/2020-2021

Hnahthial, the 22nd March 2021: Governor P.S. Sreedharan Pillai leh Lady Governor Reetha Sreedharan te chuan vawiin khan Hnahthial, Hnahthial District khawpui chu an tlawh a. He hunah hian District heads of offices te  a kawm a. Khawtlang hruaitute a kawm nghal bakah hmun pawimawh te a tlawh nghal bawk a ni.

Governor P.S. Sreedharan puala official programme chu Government Hnahthial College-ah Hripui leng mek laka sawrkarin mipui himna tur dan a zam te tha taka zawmin hman a ni a. Hnahthial Bawrhsap Pu H.Dolianbuaia chuan khuallian te nupa district aiawha  lo lawmna thu sawiin thu hmahruai a nei hmasa a.  Hemi hnuah hian Pi Jennifer Vanlalhruaii Pachuau, SDC hnen atangin Hnahthial District a thil langsar zual te, Hnahthial District a mibik leh hmingthang te chanchin, District inrelbawla chungchanga hriattur pawimawh zual leh district thar a nih anga hmabak te chipchiar taka report ngaihthlak a ni a. Dan leh thuphek kaihhnawih bikah hriattur pawimawh zual te Pu Lalbiakkila Tlau, Superintendent of Police hnen atangin ngaihthlak a ni thung a ni. Hnahthial mipui te tana thuchah sawina hun Governor P.S. Sreedharan Pillai chuan a hmang chhunzawm nghal a. Hnahthial mipuite chu hunrei tak atang tawha theihtawp chhuaha an lo nawr thin, District thar, an mamawhna te  hriatsaka  pek an ni ta chu a lawmpui takzet tih a sawi a. Hnahthial district chu district naupang tak nimahsela ei leh bar kawngah intodelh thei tur khawpin a ram leh hmunhma te a that avangin theihna a nei nia a hriat thu a sawi a. Myanmar nen ramri intawm a nih avang pawhin border trade pawimawh tak Hnahthial District-ah a la awm thuai a beisei thu te pawh a sawi bawk a. Governor chuan Hnahthial District chu District thar a nih angin sawrkarin a ngaihven a; tihphuisui chhoh zel pawh  a tum a ni a ti.

Sawrkar hnathawk te district thar tan an pawimawh dawn tih a sawi a. District hmasawnna atan te leh mipuiin an nitin mamawh (basic requirements) te an hmuh theih nan Sawrkar hnathawkte an pawimawh hle tih a sawi a. State intodelh kan nih theih nan chuan District zawng zawng te pawh district intodelh kan nih a tul a. Hnathial District pawh district thar leh hmasawn chak a lo nih theih nan official ten bul an tan that a ngai a, district danga official te ai mah a tan an lak nasat a ngai dawn a ni a ti.

Official te a kawm hnuah hian Governor chuan Kohhran hruaitute, Tlawmngai pawl hruaitute leh Political Party hruaitute a kawm leh a. He hunah hian inpawh takin district mamawh leh thil tul te sawiho a ni.

Governor P.S. Sreedharan Pillai chuan vantlang inkhawm programme a neih hnu hian Krishi Vigyan Kendra(KVK) leh KVK chhunga School of Agricultural Science(SAS) te a tlawh a. Helai hmunah hian ram hmasawnna leh intodelhna atana Agriculture pawimawhna te zirlaite fuih nan a sawi a. KVK Office kawt tualah KVK, Hnahthial hnuaia mithiamte hmalakna hrang hrangte leh thlai chin dan chi hrang hrang atanga thlai leh thei rah thar te Governor chuan a endik nghal bawk a. He hunah hian nikum lamah Governor lo hmuak tura inpuahchah  laia a hnathawhna hmun KVK, Hnahthial a lungphu chawla thi ta Dr Lalmuanzovi, Sr Scientist & Head chu thinlung takin a ui tih a sawi bawk a ni. Hemi zawhah hian District Hospital pawh a tlawhin  a fangkual leh nghal a. Doctor te, Nurse te leh Medical Staff te nen inkawmna neiin an hnathawh leh an mamawh te a zawt a. A theihna zawnah District Hospital hmasawnna atana theih tawp chhuah a tum thu te a sawi a ni.