No.7872/2020-2021

Dated Champhai, the 22nd March, 2021: Tlangsam Lal Thanghlianga Sailo hriatrengna lungdawh a tu leh fate buatsaih chu vawiin chawhnu khan khuallian Law & Judicial Minister Pu T.J. Lalnuntluanga chuan Tlangsamah a hawng. He hunah hian Pu Lalrintluanga Sailo, Govt. Deputy Chief Whip chu khualzahawm a ni.

Khuallian Pu T.J. Lalnuntluanga chuan Thanghlianga Sailo leh a mah thlahtute atangin zofate inpumkhatna ngaihpawimawh a nih zia leh a tul zia lantir a ni, a ti a. An lal hun chhungin mirethei leh harsa tam takte chhawmdawlna pek thin an nih thu sawiin, an thlah kalzel ami Pu Sangthankima'n fahrah leh riangvaite enkawlna hmun TNT a din chuan hmangaihna leh khawngaihna an kalpui chhunzawm zel tih a entir a ni, a ti a. Kum 20 lek mi nia Abor runa a fehchhuak leh kum 26 mi nia German ral run tura a fehchhuak chuan a huaisen zia a entir chiang hle a ni, a ti a. Lehkha thiam a nih avanga tawng thiam, ral runna hmuna hotu leh hruaitu tha a nih lantir avanga hotute atanga lawmman tam tak a dawng thei chu entawntlak hle a a hriat thu a sawi bawk.

Law & Judicial Minister chuan hruaitu tha ni turin mi fing, huaisen leh ngaihtuahna tihzau a tul thu sawiin, naupangte kum 21 mi chauh ni a lal tan Pu Thanghlianga Sailo chu fakawm a tih thu a sawi a. A bial chhung Model Village atan Tlangsam  thlan a nih thu sawiin, Champhai Master Plan hnuaia Ring Road siam mekah Tlangsam leh Zotlang inkar laih zawha white topping tih mek a nih thu leh Tlangsam leh Zote inkar pawh siam mai theih tura bawhzui a nih thu a sawi a. Khawtlang hruaitute leh ram neitute tawiawm thinnaah lawmthu a sawi bawk a. Tlangsam khaw hmun hluiah Cultural Centre din tuma inbuatsaihna kalpui mek a nih thu leh a bul maiah Eco-Tourism Park buatsaih tuma hmalak mek a nih thu a sawi a. Border Trade kalpui nan New Champhai atanga Tiau pawh tura kalkawng sial tuma project thehluh a nih thu pawh sawiin, finna, remhriatna leh huaisenna nei tura finchhuaha dilpui fo turin bial mipuite a sawm a. Khuallian chuan  mihringte hmuh theih lungdawh mai ni lo mahni thinnlung theuhah mite tana malsawmna ni tura lung dawh tum turin kalkhawmte a sawm a ni.

Thusawitu dang khualzahawm Pu Lalrintluanga Sailo chuan Pu Thanghlianga Sailo lalna tlang ngeia a mah chawimawina leh hriatrengna hun buatsaih a ni chu lawmawm a tih thu a sawi a. Mahni thlahtute chawimawina hun buatsaih tura Pu Thanghlianga Sailo fate leh mi thahnemngaite hmalakna chu fakawm tiin, hun hman ngaihlua hluttute chungah lawmthu a sawi a. Zofate hmakhua ngaiin sawrkarin hma a lak zel thu sawiin, tanpui leh humhim ngaih hunah theihtawp chhuah tlan a tul thu a sawi a. Covid-19 hrileng vangin hmasawnna hnathawh kawngah khaihlakna awm thin mahse harsa chung chung pawhin sawrkarin hmasawnna rualkhai siam tuma tan a lak chhunzawm zel thu a sawi bawk.

Lungdawh hawnna hun hi Pu Vanchhunga, VCP Tlangsam chuan a kaihruaia, Upa F.Lalsangliana, Tlangsam-in hunserh a hmanga. Pu Lalnunmawia'n kalkhawmte inhmelhriattirna a nei a. Pu Vanlalhruaia Sailo in chhungkaw aiawhin thu a sawi bawk.

Pu Thanghlianga Sailo (1891-1957) hi Pu Lalsanga Sailo, Ngur lal fapa niin lal rorel thiam, khua leh tui ngaihsak mi leh mite ngainat hlawh a ni. A hunlaiin khaw tih tham tak tak panga- Tlangsam, Zote, Buangtlang, N.Khawbung leh Ngurte a awp hmana, kum 42 chhung lai lal niin ro a rel a ni.