No.7873/2020-2021

Kolasib dated 22nd March 2021: Vawiin chawhma khan Parish Hall, Venglai, Kolasibah PHED, Kolasib WATSAN Division bultumin World Water Day lawmna hun hman a ni a,‘Tui Ngaihhlut’ tih thupuia hman niin Dr.H.Lalthlangliana, Deputy Commissioner chu khuallian a ni.

Khuallian Dr.H.Lalthlangliana chuan tui hi thil nung engpawhin a dam khawchhuahnana kan thil mamawh hmasak ber a nih thu sawiin van sang chanchin zir mite pawhin planet dang an zirnaah pawh tui awm leh awm loh hi tehfung pawimawh berah an hman thin thu a sawi a. Taksa hriselna atan pawh tui kan mamawh ang kan in thin a pawimawh hle a ni, a ti. Tui thianghlim intur hnianghnar kan neih theih nan kan tui hnarte kan humhalh a, kan enkawl thianghlim a ngai a ni, a ti a, tui hna humhalhna atan ram ngaw humhalh tel a pawimawh zia a tarlang bawk a ni. Deputy Commissioner chuan kawr leh luite enkawl fai kawngah thalaiten mawhphurna sang tak an neih thu a sawi a, bawlhhlawh, a bik takin sarang kan paih danah fimkhur zual a, hemi kawnga midangte entawn tur leh zirtirtu nih tum theuh turin kalkhawmte a chah a, thingphun uar a, ram ngaw humhalh pawimawhna thu kengtu nih tum theuh turin a fuih bawk a ni.

Pu H.Lallianmawia, Sr. Executive Engineer chuan World Water Day vawi 29-na lawmna hun hi kaihruaiin World Water Day chu 1993, March ni 22-a hman tan a nih dante leh he ni hmanna atanga tui hlutna hrechiang lehzual a, a renchem kawnga thawhho a tulzia a sawi bawk a ni. Pu Lalawmpuia Sawthly, SDO chuan  ‘Understanding Water Cycle and Concept of Water Conservation’ tih thupuia hmangin zirtirna a pe a, ruahtui khawl kawnga tan lak a pawimawh thute leh kawr leh luite enkawl thianghlim a tul thu a tarlang bawk a ni. Mualkhang leh N. Chawnpuite, tuihna enkawl leh humhalh kawnga an hmalaknate ngaihthlak a ni a, ‘World Water Day’ puala thu inziahsiak buatsaiha titha thlan chhuahte hnenah chawimawina thuziak leh lawmman hlanna hun hman nghal a ni bawk. Lawmman pakhatna hi Pu C.Lalnunsanga, N. Chaltlang a ni a, Pu Lalramchhana, Saihapui V chu pahnihna niin Pu CH.Lalnunsanga’n pathumna lawmman a dawng bawk a ni. Vawiin World Water Day lawmnaah hian Kolasib district a department hrang hrang hotute, NGO hruaitute leh College zirlaite an tel a, Pu Lalhruaitluanga, SDO, PHE department chuan lawmthu sawina hun a hmang bawk a ni.

KVK, Kolasib district pawhin World Water Day lawmna pualin Lungdai Organic Farmers’ Association, Kawnpui Women Farmers' Club leh Thingdawl farmer thlan bikte nen ‘Tui hlutna’ awareness programme an hmang a. Dr. Michelle C. Lallawmkimi’n thupui sawi zauna hun neiin District Agriculture Officer Pu C. Lalthlamuana pawhin thu a sawi a, Pathian thil thlawn pek, tui thianghlim, luang ral tur ven kawngah mahni phak tawk theuha hma la turin kalkhawmte a chah a ni.