Project Pushpak leh ICFAI University, Mizoram te chuan Swachhata Hi Sewa – 2018 Campaign pualin September ni 15 atang khan October ni 2 thleng Aizawl khawpui chhung hmun hrang hrangah faina beihpui an thlak a. Vawiin khan Rajat Auditorium-ah a kharna hun buatsaih a ni a, Mizoram Governor Pu Kummanam Rajasekharan chu Khuallian a ni.

Khuallian Pu Kummanam Rajasekharan chuan kan hnampa Pu Gandhi-a kaihhruaina hnuaiah India chuan zalenna a hmu a, mahse a lo suangtuah thin India ram fai tak chu vawiin thleng a puiltin a la nih loh thu a sawi a. India ram chu ram thang lai mek a nih angin harsatna hrang hrangin a tlakbuak mek a ti a. Faina beihpui thlak chu chung harsatnate sukiang tura bultanna tha ber a nih thu leh ram hmasawnna atana pawimawh tak a nih thu a sawi a ni. India khua leh tui te chuan he hmalakna hi inunauna thinlung pua inlungrual taka thlawp tura a duh thu sawiin, a hlawhtlinna chuan danglamna lian tak India tan a thlen dawn a ni, a ti. Governor chuan faina chu Mizote nunphung a bet tlat a nih thu leh an chin dan tha te chu ramdangte entawn tlak a nih thu a sawi bawk a ni.

Mizoram ICFAI University Vice Chancellor Lt. Gen. (Dr.) AK Misra, AVSM (Retd.) chuan ICFAI University Mizoram leh Project Pushpak te thawhhona chu lawmawm a tih thu sawiin, zirlai naupangte tan pawha sipai te thawhpui theihna remchang tak a nih thu a sawi a. Mizo mipuite chu faina ngaipawimawh leh khawtlanga inlungrual thei tak an ni tiin, kalkhawmte chu chin chhunzawm zel turin a duh thu a sawi a ni. Faina bakah mahni hriselna ngaipawimawh turin a chah bawk a ni.

Project Pushpak Chief Engineer Brig. Birender Singh pawhin Project Pushpak chu kum 50 chuang Mizoram tan a lo thawh tawh thu a sawi a. Ramria kawngpui siamthat bakah tunhnaia sawrkar laipuia hmalaknate chu phur taka a thlawp thin thu a sawi a ni. NH54 kawngpui dung vawnfai chu a ngaihpawimawh thu sawiin, Aizawl khawpuia lut turten phur takin an luh phah dawn a ni, a ti.

He Swachhata Hi Sewa – 2018 Campaign chhung hian Project Pushpak chuan activity chi hrang hrang a buatsaih a. Bawlhhlawh sawngbawl dan chungchangah lecture te, naupang tan lem inziahsiak te leh Quarters fai inelna te a buatsaih a ni. He kharna programme-ah hian Khuallian chuan Thuampui Local Council, ICFAI University Mizoram aiawhte leh midang chanvo neite hnenah lawmman a hlan nghal a n