Tukin zing khan Pu Joseph Lalhimpuia Lunglei 'E' bialtu MLA leh Chairman, Mizoram Youth Commission ni bawk chuan cheng nuai hnih seng a sak ‘Chhumchhe In’ Electric Veng Lunglei ah a hawng.

Chhumchhe In hawnna inkhawm hi Pu Lalthlamuana, President Branch YMA, Electric Veng in kaihruaiin Pu Joseph Lalhimpuia chuan kuttualleichham leh miharsa zawk te chenna atan a branch YMA in phal tak YMA ram ah Chhumchhe In an sak sak avangin lawmthu a sawi a. Building lianpui pui hawn  leh lung te a lo phum nual tawh a, mahse he Chhumchhe In hi miharsa zawk ten thlamuang taka  an chen theih dawn avangin  hawn a chak thu a sawi a.YMA leh khawtlang mipui te thawhhona leh lungrualna avangin Electric Veng chhung ah hmasawnna tam tak hmuh theia awm thu a sawi a, heng hmasawnna te hi hmang tangkaia neitu rilru pu theuh turin a chah a ni.

Chhumchhe In  hi a dung 24ft leh a vang 12ft niin Pu Joseph Lalhimpuia'n MLA Fund cheng nuai hnih a thawh leh YMA tha tam tak seng a sak a ni.

Vawiin zing vek khan Pu Joseph Lahimpuia chuan Electric Veng ah NEDP Model Road siam tur chu a bul tanna khawtlang hruaitute nen an nei a. He model road awmna tur hmun hi step ulh deuh niin  chhungkua tam tak tan a veivah leh chakkhai lam nana kal harsa tak ania, chhungkua tam tak tana a awlsam phah  nan  mahni ram sah thlak a motor tlan theih a siam ani dawn ani. He kawng siam tur hi 150 mts niin NEDP kaltlanga hnathawh tur a ni.