Vawiin khan Mizoram Youth Commission Chairman Pu Joseph Lalhimpuia’n Mizoram chhimlam atana MYC hmunpui tur ‘MYC Southern Mizoram Zone’ chu Top Floor, SSA Office, Venglai Lungleiah a hawng. He hunah hian MYC Commission member Prof J Zorema leh MYC Founder Chairman Pu ZH Ropuia te bakah sawrkar official-te, Lungleia prominent citizen-te leh MYC hnanthawktute leh zirlalite an tel.

Hawnna programme Pu Thangropianga, DLEO Lunglei Disitrict kaihhruaiah MYC Chairman chuan MYC Southern Mizoram Zone chu chhimlam mipuite, a bik takin thalaite tan kawng engkima hmasawnna thlentu a nih ngei a beisei thu leh lehkha zirna leh eizawnna kawng inkawhhmuhna hmunpui tura ruahman a nih thu sawiin “Thalai tam zawk ten tumruhna nen hlawhtlinna an hmuh ngei kan beisei a ni” a ti.  Hlawhtling tur chuan rinawmna, taimakna leh tumruhna a pawimawh thu sawiin khawi hmunah pawh mi hlawhtlingte chu hlawhchhamna an tawh chang pawha beidawng duhlo a bei talh talh, mi tuarchhel leh taimate an ni, a ti a. Ṭhalaite khawvel zauh kawngah theihtawp an chhuah mek zel  a ni tiin, MYC Chairman chuan chu'ng zingah chuan Central IAS Online Coaching leh SSC Coaching siam a nih thu te, ṭhalaite tana mi entawn tlak leh entawn tur thlan chhuah Young Achiever's Award 2018 buatsaih a nih thu te, Incentive Cash Award pek chhuah mek zel a nih thu te, Mizo thalaite an inpumkhat na tura hmalakna Kohhrana ṭhalai pawl hruaitute tan India rama Kohhran hmun pawimawh hrang hrang te tlawh theih nan Exposure Tour programme siam a nih thu te, District tinah Youth Centre changtlung tak buatsaih a nih tur thu te,Mizoram mawina leh hlutna khawvel hmuha pho chhuah a, tourism tihmasawntu a lo nih theih nan photographer-te nen ṭangkawpa hmalak tum a nih thu te a sawi.

He huna khualzahawm MYC Founder Chairman Pu ZH Ropuia chuan Mizoram Youth Commission lo dinchhuah dan chanchin tlangpui sawiin he Commission din tura vawi tam tak sawrkar laipui hotute an dawr thu leh Mizoram Youth Commission Act, 2008 duang dan chanchin kalkhawmte a hrilh a. Mizoram Youth Commission kal zelna turah duhsakna a hlan bawk.

Pu Lalmuanzuala, Youth Commission Officer in Report pein MYC Commission member Prof J. Zorema’n lawmthu sawina hun a hmang.

MYC Southern Mizoram Zone hnuaiah hian UPSC Online Coaching (ALS), SSC Coaching, IBPS (Banking), NEET leh IIT-JEE Coaching-te ngawrh taka kalpui mek niin thalai 500 chuang zirlai leh sipai tan tumte training leh zirtirna pek mek zel an ni. MYC Southern Mizoram Zone zirlaite atangin IBPS prelims exam mi 25 in an paltlang a, MPSC Combined Competitive Exam 2018 prelims ah mi 5 inziak tlingin UPSC leh SSC zirlaite pawh ngawrh takin an inpuahchah mek zel a ni.