Vawiin khan Parliamentary Secretary Pu Lal Thanzara chuan “Strengthening of Existing School Building Under RMSA” hnuaia cheng nuai 30.81 a sak, Govt. Bawngkawn High School building thar chu a hawng.

Pu Lal Thanzara chuan school building thar Govt. Bawngkawn High School-in a nei ta chu zirtirtute leh naupangte a lawmpui thu a sawi a. Zirlai naupangte chu taima taka zir chho zel a, mithiam chhawr tlak an nih theih nan theihtawp chhuah turin a fuih a. Zirna hi hmasawnna rahbi pawimawh tak a ni tiin, “thiamna tak tak tello chuan ram in hma a sawn theilo a ni” a ti. Chutih rualin zirtirtute chu zirlaite entawn reng an nih avangin an nungchang te fimkhurturina chah bawk. Parliamentary Secretary chuan zirna tihmasawn kawnga Sorkar hmalakna thenkhat a tarlang a, “Strengthening of Existing School Building” hnuaiah hian school building 154 sak zawh tawh niin, 45 chu sak mek a nih thu leh building 81 dang sak belh tur ruahmanna kalpui mek a nih thu te a tarlang bawk.

Govt. Bawngkawn High School building thar hi a dung feet 44, a vang zawng feet 18 a sei a ni a, chhawng hnih awmin room paruk a awm a, heng te hi classroom pahnih, Library, Science Laboratory, Computer Room leh Art Room pakhat theuh a awm a ni. Govt. Bawngkawn High School hi kum 1988 khan din niin, kum 1994 khan sorkar school a lakluh a ni.

School building hawnna inkhawm hi Pu T. Paawia, Govt. Bawngkawn High School Principal chuan kaihruaiin, Pu PC Liankunga, SMDC President chuan school chanchin tlangpui report a pe a, school building thar sakna a Work Manager Pu J. Ramsanga chuan building sak dan report a pe bawk.