Mizo thalai sipai tang tura thlan mi 209 te chu vawiin khan Vanapa Hall-ah an anmahni thlahna Army Recruiting Office, Aizawl leh Mizoram Youth Commission tena an buatsaih chu Chief Minister Pu Lal Thanhawla chuan a hmanpui a, thlahna inkhawm banah Chief Minister hian sipai tang turte chu Vanapa Hall-ah Assam Rifles compoundah a vailiam a ni.

Chief Minister chuan Mizo thalai sipai tang tur heti zat an awm thei chu a lawmawm hle a ni a ti a. Hetiang hun hi kan ngaipawimawh a, thalai a tam thei ang ber sipaia an luh theih nan central lama hotu lian te sawipui thinin, district khawpui chauh nilo thingtlangahte sipai lakna nei thin turin an ngen thin a ni a ti a. Tha taka hma la tlang chhoin tun kum li chhung ringawt pawhin thalai sangli vel sipaiah kan thun a ni a ti.Chief Minister chuan sipai tan hi eizawnna tha, an hlawh pawh avaia khawl theih a ni tiin, ram inpumkhatna atana pawimawh a ni a ti a, rilru leh ngaihtuahna inpumkhatna thlentu ni thei bawk se a duhawn hle a ni a ti a. Mizo thalai ten sipai hi a bawha bawh turin a duhthu a sawilang bawk. Chief Minister chuan Mizo thalaite sipai officerah mai nilo, khua leh tui thaah chherchhuah an nih theihna turin Chhingchhipah Sainik School tur bul tan mek a nih thu sawiin, hun rei vakloah peih mai theih a beisei thu a sawi bawk a.

Chief Minister chuan sipai tang tur thalaite chu hnam dang zingah Mizo palai an ni dawn a, chuvangin chhung lam leh pawn lamah in uluk hle turin a chah a. Training hautak tak paltlang tur an nih avangin lung tilenglo turin a fuih bawk a. Mizote chu kumpinu hun lai tawh atanga sipaiah hnam rinawm, dawt sawi ngailo leh thuawih tak kan ni tih hre reng a, he nun zemawi hi vawng nung tlat reng turin a chah bawk a ni.

Mizoram Youth Commission Chairman Pu Hmaingdailova Khiangte pawhin thu sawiin training hahthlak tak nei tur an nih avangin huaisenna, chhelna leh dawhtheihna a pawimawh hle dawn a ni a ti.

Sipai tang thar tur te hi Assam Regimental Centre, Shillong pan tur an ni.

Army Recruiting Office, Aizawla Director Col.DS Phansalkar chuan sipai hi hna zahawm, khawtlang pawh ina an zah a ni a ti a. Mawhphurhna an neihte chu rinawm taka kengkawh turin a chah a. Sipai tran hi hna hmuhna ringawtah ngailo turin a chah a, mahni Mizopuite chauh kawm tum loa midangte pawh kawma thianah siam thin turin a fuih bawk a. Midangte atangin thil tha chauh zira, saptawng leh Hindi thiam a pawimawh thu a sawi bawk a. An chhungte lakah mawhphurhna lian tak nei an nih thu a sawi bawk a. An nu leh pa te pawhin an fate rawn ngaihtuahlo tur leh an kutah chuan an him a ni tih hre tura chah bawkin a tha ber berin kan enkawl dawn a ni a ti.

Sipai tang tur thlahna inkhawmah hian Pu John Rotluangliana, Dy Speaker, Lt Col (Rtd) ZS Zuala, Parliamentary Secretary leh Pu K.Lianzuala, Chairman KVI te an tel bawk a ni.