Nimin khan Pu R.L.Pianmawia, Dy Govt. Chief Whip chuan Multi Purpose Sports Centre for Northern Region of Mizoram leh Darlawn (Augmentation) Water Supply Scheme Darlawnah a hawng.

Pu R.L.Pianmawia chuan Darlawnah Multi Purpose Sports Centre din a nih theihnana hmalatu Sports Minister chungah leh khelmual nei thei tura phal taka ram petute chungah lawmthu a sawi a. A panna tur kawng blacktopped a siam turah PWD hotute chungah lawmthu a sawi bawk a ni. Khelmual siam hna hi Lushai Engineers Ltd in an thawk a ni.

Pu R.L.Pianmawia hian sorkar aiawhin sports centre hi Jt. VC Darlawn kutah a hlan nghal a ni.

Sports Centre hawn zawhah Pu R.L.Pianmawia chuan Rs. 485.20 lakhs senna Darlawn (Augmentation) Water Supply Scheme a hawng bawk a. A hna hi kum 2012 November thla khan thawh tan niin, October 2017 khan zawh fel a ni.Tui hi Kawntlingpa leh Tuitung lui atanga pump a ni a, tunah hian connection chhungkaw 490 hnenah pek mek an ni a. Tui dah khawlna reservoir zonal tank pahnih, 3,80,000 litres leh 1,10,000 litres leng siam ni bawkin, public point 17 siam a ni bawk a. He scheme siam hna hi Gangwal Engineer & Construction Pvt Ltd, Silchar in an thawk a ni.

Hawnna inkhawm hi Pu H.C.Lalnunzira, Chief Engineer, Zone-I in a kaihruai a, PHE department officers leh staff te bakah Darlawn khawtlang hruaitute leh mipui thahnem tak an tel a ni.