Vawiin khan Rashtriya Uchchatar Shiksha Abhiyan (RUSA) hma laknain Govt Lawngtlai College-ah zirlaite hma lam hun atana kawng inkawhhmuhna hun (career guidance & counselling programme) buatsaih a ni.

He hun hi Govt Lawngtlai College-a RUSA Coordinator leh Assistant Professor Dr C. Ramhnehzauva'n a kaihruai a. Principal Pu T. Thangthuama'n fuihna thu tawi sawiin, zirlai chuan nih tum leh beisei an nei vek a, chumi tihlawhtling tur chuan nasa taka beih a tul a ni, a ti a. Career guidance hun buatsaih chu hlawkpui ngei tum turin zirlaite chu a chah.

Resource person, Lawngtlai DIPRO Pu C. Lalhruaitluanga chuan zirlaite chu an zirna leh eizawnna kawnga hlawhtlinna chang tura thil pawimawh hrang hrang zirtirin, College an chhuahsan hnua an hna thawh theih tur hrang hrang te a hrilhfiah a. Mihringte career pawimawh ber chu zirna emaw, hna emaw ni lo va, nun zawk a nih thu sawiin, zirlaite chu fimkhur taka an nun hmang a, nun hlawhtling neih tum turin a chah.

He hun hmanah hian Govt Lawngtlai College-a 5th Semester zirlai, H. Rohmingmuana hnen atangin zai ngaihthlak a ni a. GLTC-a Head Assistant Pi Malsawmtluangi'n lawm thu sawiin, hun tihtawp a ni.

Attachment

  • Loading attachment...