Mizoram Legislative Assembly hnuaia Assembly Committee peng pawimawh tak pakhat Subject Committee III chuan vawiin khan an Chairman Dr.Z.R.Thiamsanga hovin Zoram Medical College an tlawh. Subject Committee III member vawiin ZMC tlawha kal te chu MLA te- Pu Lalduhoma, Pu K.T.Rokhaw, Pu H.Biakzauva, Dr Vanlaltanpuia, Pu Lalrinsanga Ralte leh Dr Vanlalthlana te an ni.

Zoram Medical College ah hian an Director Dr.L.Fimate leh officer dang ten MLA te hi an lo dawngsawng a. ZMC office-ah meeting pawimawh an nei a, hemi zawh hian ZMC Hospital leh building dangte an fang zui nghal a ni.

Assembly Subject Committee-III member-te hian MBBS first year zirlaite tlawhin programme tawi an hmanpui a. An Chairman Dr.Z.R.Thiamsanga chuan ZMC an tlawh chhan sawiin Medical College leh Hospital dinhmun te, hma an sawn dan te, sawrkarin eng angin nge hma a lak tih leh harsatna an tawk em tih te enfiah tura kal an nih thu a sawi a. MLA te chuan ZMC hi an ngai pawimawh takzet tih sawiin he medical college hi Mizoram mipui te ta, zirlaite ta a ni a, chuvangin India rama doctor zirna hmun tha ber a nih theih nana tan la turin thawktute leh zirlaite a fuih a ni.

Vawiin programme-ah hian Health Department atangin Hospital and Medical Education Director Dr.T.Lalhmangaihi, Deputy Secretary Pi R.Lalmuankimi, Dr Lalngura Tlau, Joint Director Dr.P.C.Lalramliana, Sr.E.E. Pu C.Lalkima leh Joint Director Dr Vanlalsawma te an tel a ni.