Vawiin khan Mizoram Rural Bank (MRB) in an din cham vawi 37-na “37th Bank Day”, Dawrpui Multipurpose Centre Auditorium ah an lawm a, I&PR Minister Pu Lalruatkima’n khuallian niin a hmanpui.
Vawiin hun hmanpuitu khuallian Pu Lalruatkima chuan MRB in Mizoram tana hna an thawh te ropui a tih thu a sawi a, Pathian leh mihring rawngbawlna a ni tih hria a theihtawp chhuah a tan la zel turin a chah a, Sawrkar Flagship programme SEDP hnuaiah thingtlang hmasawnna chi hrang hrang kalpui a nih dawn avangin MRB te nen pawh thawhhona tha tak an neih a ngai dawn a ni a ti a. Rural Development Department changtu Minister a nih angin RD hmalakna chi hrang hrang ah MRB te nen thawhhona tha tak an neih thin avangin lawmthu a sawi a, thawhhona tha tak an neih chhunzawm zel a beisei thu a sawi. Corporate Social Responsibility hnuaia mipui vantlang tana an luanchhuah thinna chu a ropui a tih thu sawiin nasa lehzuala midangte tana malsawmna ni tura luangchhuak zel turin duhsakna a hlan a ni.
Vawiin MRB Bank Day vawi 37-na lawmna ah Pu V. Jaya Chandra, Chairman, MRB in Branch tha ber thlanchhuah 10 hnenah lawmpuina leh chawimawina a hlan a. MRB staff te zinga hnathawk tha te hnenah chawimawina Chairman’s Club Member, General Mananger’s Club Member Regional Manager’s Club Member hlan an ni a, Pu S.M. Mallick, General Manager, NABARD, Aizawl-in online a bank report inpek zung zungna portal thar eRIM a tlangzarh a, General Manager, RBI, Aizawl-in MRB atanga thlatin hlawh la te tana hamthatna chi hrang hrang duan thar “Salary Package Product” a tlangzarh bawk a ni.
Vawiin Bank Day pual hian MRB chuan Muanna In, Mualpui hnenah Refrigerator (311 ltrs) leh Carrom Board an pe a, Abundant Life Home, Durtlang hnenah 2.2 KVA Inverter, Gan Sabra, Luangmual hnenah RO Filter, Hmangaihna In, Durtlang hnenah an project pakhat tihhlawhtlin nan Rs. 50,000/- an pe a, khuallian Pu Lalruatkima’n heng thilpekte hi a hlan a. MRB Social Media page mizoramruralbank (Instagram) leh mizoramruralbank (Facebook) a tlangzarh nghal bawk a ni.
Mizoram Rural Bank hi India sawrkarin September ni 27, 1983 ah Regional Rural Bank Act, 1976 hmangin a din a, Scheduled Bank niin, India sawrkarin Commercial Bank dangte nen inanga a ngaih a ni. Tun dinhmunah hian Branch 85 neiin Mizoram chhung District leh RD Block zawng zawng a tuamchhuak vek a. Government of India, State Bank of India leh Government of Mizoram ten neitu nihna intawmin mimal share nei an awmlo a ni. Bank Chairman atan hian sawrkar laipuiin SBI mi leh sa a ruat thin a, Board of Directors te hi Government of India, State Bank of India, Government of Mizoram, Reserve Bank of India leh NABARD atanga mithiam rual ruat an ni.
Mizoram sawrkar hian MRB-ah hian neitu nihna chanvo (share) 15% a neih angin kumtina hlawkna (profit) a siam chu Mizoram sawrkarah chhun luh thin a ni a, MRB a pawisa dah luh leh Bank-in hlawkna a hmuh te hi Mizoram chhungah ngei hman zel a ni. Kum 2011 July thla atangin MRB Branch zawng zawngte chu CBS (Core Banking Solution) system hmanga thlunzawm vek ni tawhin, Mizoram chhung mai bakah India rama Bank zawng zawng te nen awlsam takin a in dawr tawn theih tawh a ni. Tun dinhmunah Mizorama Bank zinga branch ngah ber niin customer nuaih 8 chuang an nei a ni. kumin kum kal lai mekah hian Branch thar 4 hawn belh tum a ni a, kumtin Branch 8-10 hawn belh ziah turin ruahmanna siam mek a ni bawk. Branch la hawn lohna khua ah te mipuiten harsatna an tawh lohnan MRB chuan Financial Inclusion Plan hnuaiah Corporate Business Correspondent nena tangkawpin mi 67 a ruai mek a, thahnemtak rawih belh tum mek a ni bawk. Heng mi te hi Business Correy Agent tih niin khaw hrang hrang 143 zet tuamin pawisa dahluh, lakchhuah, inthawn, loan rulhna leh Account thar hawn thlengin anmahni kaltlang hian a tih theih a ni.
MRB hian accumulated loss nei lovin kumtin profit tam tak a nei thin a, India ramchhunga Regional Rural Bank (RRB) hrang hrang zingah kawng hrang hranga tehin dinhmun tha pawl takah a ding mek a ni. A din tirh leh tuna MRB dinhmun chu hetiang hi a ni.
Tehfung 1983-84 2018-19
Total Deposits (in lakh) 23.00 259504.92
Total Advances(in lakh) 25.13 123101.50
Total Business (in lakh) 48.13 382606.42
Total Employees 55 415
No. of Branches 20 85
District covered 2 11
MRB ah hian pawisa dah theih dan Scheme hrang hrang a awm a, chungte chu : Savings Bank (SB) Account, Salary Package Account (Sawrkar hnathawkte tan), Basic Savings Bank Deposit Account, Current Account, Fixed Deposits, hei bakah hian PMJDY leh Social Security Schemes (insurance) an kalpui bawk. Hei bakah hian Loneitu leh ran vulhtu ten hma an sawn theihna turin loan chi hrang hrang Kisan Credit Card, Agricultural Term Loan, Allied Agricultural Term Loan an nei a. Sawrkar hnathawkte tan Housing Loan, Personal Loan, Car Loan, Two-wheeler Loan leh Festival Loan te an pe chhuak thei bawk a ni. Sawrkar nen tangruala Loan lak theih chi hrang hrang an la neih bakah Biak In leh Hall sak theihna tur Loan (Community Hall Loan, Rs. 450 lakh thleng lak theih) pawh an nei a ni.
Tunah hian anmahni dawrtute awlsam zawkna atan India ram puma hman theih ATM (RuPay Debit) card an pechhuak mek a, online shopping, bill payment, mobile top-up, DTH recharge etc. nan a hman theih tawh a ni. Internet Banking (view rights) anmahni dawrtuten mahni inlum atanga an account pawisa che vel an en theihna a awm a, mobile banking application hmangin pawisa che vel leh account statement te a en reng theih tawh bawk a ni.
