District Hospital Lawngtlai staff, Chief Medical Officer staff leh ANM School Lawngtlaia zirtirtu leh zirlaite chuan tukin zingkar khan Ayushman Bharat Pakhwada (Healthy India Fortnight) leh Kayakalp 2019 pualin Lawngtlai khawpui chungah kawng an zawh.

He walkathon-ah hian District Hospital Lawngtlai atanga tan a, Lawngtlai khawpui chhung kawtthler fang kualin, au hla hrang hrang hmangin an au rual a. Lawngtlai Bazar Venga Areopagy-ah tawpna hun hman a ni.

Areopagy-a hun hmanah hian District Hospital Lawngtlaia District Medical Superintendent charge la mektu Dr Zothanpari Chhakchhuak chuan kawng zawh huaihawt a nih chhan a sawi a. Damdawi in fai intihsiakna 'Kayakalp 2019' atana inbuatsaihna kal mekah District Hospital Lawngtlai chu mipui ta a nih angin a vawn thianghlim lam pawh mipuiin an mawhah la thiam se a tih thu a sawi a. Damdawi in pantu zawng zawng chu damdawi in vawn fai kawnga an hma laknaah thawhpui turin a sawm a ni.

India ram hriselna puala chawlhkar hnih chhung hun hman tur, 'Ayushman Bharat Pakhwada' chungchang pawh sawiin, Dr Zothanpari Chhakchhuak chuan he chawlhkar hnih chhung hian mi harsa zawkte'n damdawi ina an inenkawlna senso rulh letna chhungkaw khatin kum khat chhunga Rs 5,00,000/- (nuainga) thleng sawrkar atanga an dil let theihna tur, AB-PMJAY chungchang inzirtirna  buatsaih a nih bakah, he scheme atana golden card siam theih a ni dawn tih a sawi a. Chuti ang hamthatna hmang thei tur chuan damloh hun nghak kher lova inhmakhua nachang hre turin mipuite chu a chah bawk.

DMS-in thu a sawi zawh hian ANM School Lawngtlaia zirlaite'n thiam taka cheraw kanin, lawm thu sawina nen hun khar a ni.