Nimin ni 28th September, 2019 khan Health & Family Welfare, Higher & Technical Education leh Commerce & Industry Minister Dr. R. Lalthangliana leh Sports & Youth Services, Tourism leh Information & Communication Technology Minister Pu Robert Romawia Royte te chuan Shillong Mizo Students Union (MSU) din champha vai 40-na 'Ruby Jubilee' lawmna an hmanpui. 

 

Ruby Jubilee lawmnaa khuallian Minister Dr. R. Lalthangliana, Shillong MSU founding President ni bawk chuan Shillong MSU chu ni 1st November, 1979-ah chutih laia All Mizo Students Federation (AMSF) leh Mizo Zirlai Pawl (MZP) te inchhunfin atanga lo ding a ni tih a sawi. H&TE Minister chuan Shillong MSU motto chu – For Mizo nation’ – tih a nih angin, Mizo nationalism atana ding a ni tih a sawi a. Shillong MSU magazine hmasa ber 1980-a chhuah chu khami khan 'Best Mizo Magazine of the Year' a thlan a ni nghe nghe a ti. Khuallian hian zirlaite chu mahni inrintawkna leh taimakna nen kawng engkimah thiam bik ni tura lehkha zir turin a fuih a ni.  


Minister Dr. R. Lalthangliana hi NEHU-a Sociology Department atanga M.Phil leh Ph.D hmu hmasa a ni. Hetih hun laia All Mizo Post Graduate Students Union (AMPGSU) General Headquarters President a nih bakah 1979-a Assam-a din North-East Region Students Union (NERSU), tuna North-East Students Organization (NESO)-ah Senior Vice-President niin a sulsutu berte zinga mi a ni.

He huna Khual zahawm Sports & Youth Services Minister Pu Robert Romawia Royte chuan Shillong chu hmanlai atang tawha Zofaten zirna tha an dawnna hmun a nih thu leh Mizote zingah Shillong-a zirchhuakte chu sumdawnna, politics leh sawrkar hnaah pawh mi hlawhtling an lo ni tawh thin thu a sawi. Tuna zirlai awm e pawh lehkha zir chu an kal chhan a ni tih hria a, nu leh paten an lo beisei an ngeia result tha tak nei tura taima turin a fuih.

Tunah hian MSU-ah hian member zirlai 3500 vel an awm mek a ni. Shillong MSU 'Ruby Jubilee' lawmnaah hian val upa chawimawina Prof.C.Nunthara leh Dr.T.T.Pachhunga te hlan an ni.

Attachment

  • Loading attachment...