2477/2025-2026
2nd December, 2025 : Vawiin khan Govt. Mizo High School Thul 2025 chu School Education Director Pi Angela Zothanpuii’n a hawng a. He thul Exhibition-ah hian zirlaite kutchhuak thil chi hrang hrang mipui en theih tura pho chhuah a ni.

School Education Director Pi Angela Zothanpuii chuan he Thul 2025 hawnnaah hian thusawiin Govt. Mizo High School chu Government School zinga chhuanawm ber pawl a nih thu te, zirtirtu pawh chhuanawm tak tak an nih thu a sawi. Director chuan tun hnaiah room chhung boruaka thil nawi zirchiang thei Hospisafe ZMC&H a present tur an siam chhuak thei chu chhuanawm a tih thu leh zirtirtuten hetiang tithei tura zirlaite an kaihruai thei chu lawmawm a tih thu a sawi a, hetiang zirtirtu tha an awm hi zirlaite tan pawh lawmna tur a ni a ti a. Hriatna leh thiamna kan neihte hi mite hmuhah a eng tur a ni a, chutiang tih theihna Thul 2025 a awm chu lawmawm a tih thu a sawi a. Literature club zirlaite thu leh hla ziahna Thulkhung tih lehkhabu a tlangzarh bawk.

Govt Mizo High School Thul 2025-ah hian zirlaiten an thiam thil leh kutchhuak chi hrang hrang an entir a, Adventure-Zip lining, food stall, indegenious entertainment, Arts & craft, Beauty & wellness, house of horror leh Career guidance neih a ni.

Govt. Mizo High School Thul 2025 hawnnaah hian Govt Mizo High School Pipe band ten rimawi kalrem hmuhnawm tak an entir a, Cultural club ten lam an entir bawk.