Govt. Aizawl College Conference Hall, Rs.4,91,934 seng a sak chu Education Minister Pu Lalsawta’n a hawng a, Teachers’ Day lawmna a hmanpui bawk.

Pu Lalsawta chuan Zirtirtute Ni-a Hall tha tak hawn a ni chu lawmawm a tih thu sawiin, Govt. Aizawl College-in zirna tihhmasawnna kawnga an hnathawhte chhuanawm a tih thu a sawi a. Conference Hall tha tak, sum tlem te senga an nei thei chu College-a hnathawkte leh zirlaite inpekna rahchhuah a ni, tiin, thawhhona tha tak nena an puitlin thei chu lawmawm a tih thu a sawi bawk. “Zirna hi Mizote dinchhuahna tur ani” tih sawiin, “Tihmasawn zelturinsawrkarin hma a la mek a, a la zel dawn bawk a ni”, a ti.Govt.AizawlCollegezirtirtute chu ramin hma a sawn zel theihnan, lehkhathiam leh rintlak chherchhuakturina fuih bawk. “Zirna chu hna hmuh nan mai nilo, khua leh tui tha tak chherchhuak theitu a ni” a ti bawk. Zirtirtute Ni puala zirtirtu natna khirh tuarte tanpuina atana zirlaiten token an zawrh thin atangin, kum 2012 khan zirtirtu damlo 84 enkawl niin, kumin atangin heng token zawrhna atanga sum hmuhte hi college zirtirtute pawhin an hmang tangkai ve thei tawh dawn a ni, a ti.

He Conference Hall hawnna inkhawm hi Dr. Sangkima, Principal, Govt. Aizawl College chuan kaihruaiin, Dr. K.L. Pradhan Co-ordinator, IQAC chuan technical report a pe a, Conference hall-ah hian mi 100 chuang hret leng thei tura beisei a ni. Pu T. Lalthangfala, Vice President, Aizawl College Teachers’ Association (ACTA) chuan an College lo thanchhoh dan sawiin, Pu Lalremliana,Secretary, ACTA chuan lawmthu sawiin he Hall hawnna inkhawm hi a khar a ni.

Govt. Aizawl College hi ni 1 June,1975 a din niin, 1 January, 1989 khan sawrkara lakluh a ni a. Tunah hian zirlai 1169, zirtirtu 56 (9 part time leh contract) leh thawktu dang 16 an awm a, Arts leh Commerce ah zirtirna an pe a ni. NAAC in kum 2010-a college an endik khan ‘B’Grade Accreditation pek an ni.

He Conference Hall hawnnaah hian zirtirtute chawimawina hun hman nghal a ni a,  Higher & Technical Director leh Joint Director ten an hmanpui a ni.