Kolasib District chhunga Mualkhang khuaa Nazareth Venga khua leh tui nihna hriat chian loh chhungkaw eng emaw zat awmte chu man niin, Court-in an chungthu Dt. 27.09.2013-a a rel leh hma atan ‘Bail’-a chhuah an ni a. An lo inbenbelna Nazareth Veng, Mualkhang ah an kir leh a. Amaherawhchu, Joint Action Committee, Mualkhang ten heng mite lo chenna in hi an kalhsak avangin, chhungkaw eng emaw zatin Nazareth Veng hi an chhuahsan tawh chungin eng emaw zat la chambangin chu’ng chhungkua te chu mahni chenna in luah thei lovin an awm zui mek a ni.

Hei hi Mizoram Sorkar-in ngun taka ngaihtuahin heng mite hi, an chungchang tihchian a nih hmaa an chenna in kalhsak a nih hian, Dan hnuaia mihring tungchhova kalte chanvo inrahbehsakna leh, a tuartute tana nunphung pangngai chang pha lova a siam avangin, Court-in an chungthu a rel fel hma chuan an mahni lo chenna thin in an luah rih theihna turin an in kalhsakte hi Dt. 5.9.2013 hian hawn ngei ni se a ti a.

District Magistrate, Kolasib District hian Section 144 of Cr.P.C, 1973-in thuneihna a pek angin a hnuai mi ang hian thupek a chhuah.

1.         Joint Action Committee, Mualkhang te’n Nazareth Veng, Mualkhang-a khua leh tui nihna chiang lo, an chungthu Court-in a ngaihtuah mekte chenna in an lo kalhsak te hi, Dt. 5th September, 2013 aia tlai lovah hawn vek tur a ni.

2.         He’ng khua leh tui nihna chiang lo, an chungthu Court thuchhuah nghah laia Nazareth Veng, Mualkhanga la cheng rih turte hi, an chungah Dan-in tih tur a tih ang ni lo chuan eng mah, mi tu mahin an ti tur a ni lo.

3.         Court thuchhuakte hian Bail-a chhuak lai annih avangin an chungchang ngaihtuah mektu Court leh Sorkar remtihpuina tel lovin an awm hmun an sawn mai tur a ni lo a. Sorkar khap thil engmah an ti tur a ni lo.

He thupek hian sut a nih loh chuan, chhuah a nih atanga thla hnih chhung emaw, Court-in Bail-a chhuah mekte chungthu a rel fel thleng emaw, a rei lo zawk zawk thleng a huam ang.

He thupek bawhchhia chu IPC Section 188 hnuaia hrem thei a ni ang.