740/2023-2024

Champhai, the 9th June, 2023: Mizoram hmun dangte rualin vawiin khan Champhaiah District Level Committee on Green Mizoram huaihawtin 'Thing phun ila, enkawl zui ang u' tih thupui thlan hmangin Green Mizoram Day vawi 25-na hman a ni. Green Mizoram Day 2023 pual programme leh thingphun hnatlang hi Pu James Lalrinchhana, Chairman, District Level Committee on Green Mizoram hova neih a ni.

He hun puala inkhawm tawi Nagar Van (Urban Forest) - Khawpui Ramngaw, Champhai Zotea buatsaihah Bawrhsap Pu James Lalrinchhana chuan kum tina hun bi pangngaia Green Mizoram Day hman a ni chu hlawkthlak a tih thu leh, thing leh mau leh nungchate humhalh kawnga intuaitharna a nih avangin a zawngchhang thlak a, hei hian hnatlanga chhuakte zingah inunauna leh thawhhona tha a siam thin a ni, a ti a. Hmunhma buatsaihtu leh ruahmantu Forest Department-te hmalakna fakawm a tih thu a sawi bawk a. Green Mizoram Day chuan nungcha leh ramngaw humhalh kawngah rualkhai takin mitin thinlungah nghawng tha tak a siam ngei a beisei thu a sawi bawk.

Thingphun mai duh tawk lova enkawlzui kawnga tanlak tel a pawimawh thu sawiin, kumin a phunte pawh ngaihven zui zel turin hnatlanga chhuakte a sawm a. Champhai District chuan kuminah Mizorama ram kang veng tha District zinga 2-na dinhmun a hauh thu sawiin, ram kang ven tur awm lo tur khawpa tanlak a pawimawh thu a sawi a. Kumin kangmei hluar hun laia kang mei venga tlawmngaia chhuak zawng zawngte fakawm a tih thu sawiin, ram tikangtute lakah FIR thehluh zel a ni a ti. Kalkhawmte chu nungcha leh ramngaw hmangaih leh dimdawina chang hre tur leh, boruak leh tui thianghlim neihna tur a ni tih hriaa thingphun uar deuh deuh turin a chah nghal bawk.

He hun puala inkhawm tawi buatsaih hi Pu Lalhlupuia, Honorary Wildlife Warden, Champhai District chuan kaihruaiin Rev. Albert Lalchhanhima'n hunserh a hmang a. Zote VCP Pu RC Rodawla hnen atangin thusawi ngaihthlak a ni a. RO Champhai Pu Jonathan Lalhruaitluanga'n thingphun hnatlang neih dan turte a sawifiah hnuah DFO Champhai Pu Lalduhthlana'n lawmthu sawiin he hun hi a khar a, Green Mizoram Day thingphun hnatlangpui neih chhunzawm nghal a ni.

Vawiin Green Mizoram Day hmanna hunah hian kangmei ven kawnga hma la tha lawmmante sem chhuah a ni a. Kangmei veng kawnga khua/veng ti tha berah Leithum khua thlan niin, sumfai Rs 50,000/- leh Citation an dawng a. Mualkawi pahnihna niin Rs 30,000/- leh Citation an dawng a, Bulfekzawl chu pathumna niin Rs. 20,000/- leh Citation an dawng a ni. Chanchinbu hma la tha berah Pasaltha thlan niin sumfai Rs 3,000/- hlan niin, pahnihna dinhmun hauhtu Rihlipui leh Lenrual-te'n sumfai Rs. 2,000/- an dawng bawk. Nikum Green Mizoram Day 2022 a thingphunte vil chhunzawmtu, Plot Ambassador zinga thawk tha leh thingphun enkawl zui tha berah Excise & Narcotics Department chu thlan niin, sumfai Rs 5,000 leh Citation an dawng a, Health & Family Welfare Department chu pahnihna niin sumfai Rs 4,000 leh Citation an dawng a, pathumna District Jail Champhai chuan sumfai Rs. 3,000 leh Citation an dawng bawk.

Kumin Green Mizoram Day Champhaia thingphun hnatlang hi hmun 2, Nagar Van (Urban Forest) Champhai Zote leh LAD Ram, New Champhaiahte neih a ni a. Nagar Van-ah  Sawrkar Department 20, Sub-Hqrs. YMA, Zote Branch YMA leh VC, MJA Champhai District, District Hqrs. MUP, Sub-Hqrs. MHIP, Champhai Nature Conservancy leh District Florist Association-te an hnatlang a, thing tiak 1,290 an phun a. LAD ram, New Champhai-ah Sawrkar Department 5, NSS 2, Eco Club 1, School 1 leh New Champhai Branch YMA te hnatlangin thing tiak 650 an phun a, vawiin Green Mizoram Day puala thingphun zat hi 1,940 vel nia chhinchhiah a ni.

Vawiin Green Mizoram Day pual hun hmanah hian District Level Committee on Green Mizoram Member-te, Sawrkar Department hrang hrang thawktute, NGO, VC, Zirlaite leh Chanchinbumite an tel a. Heng bakah hian District hmun hrang hrangahte thingphun hnatlang neih a ni bawk.

Green Mizoram Programme hi Mizoram sawrkar hmalaknain kum 1999 atanga tan a ni a, hemi hnu hian urhsun takin District hrang hrangah Sawrkar leh NGO tangkawpin a huaihawt chhunzawm thin a, kum 2017 atang khan June ni 11 hi Green Mizoram Day atana ruat a ni a, kumin bikah chuan June ni 11 hi Pathianni a nih avangin vawiin June ni 9, Zirtawpni hian hman a ni.