739/2023-2024

2023 Nikir thla ni 9: Mizorama kum tina June ni 11-a hman ṭhin Green Mizoram Day chu kumin hian Pathianni a nih avangin Lawngtlaiah chuan vawiin khan hman a ni a. He ni pual hian Lawngtlaia sawrkar department hrang hrang, zirna in, District MJA leh tlawmngai pawl te chuan Kaladan Multi Modal Transit Transport Project (KMMTTP) kawngpui sir, Lawngtlai aṭanga kilometre 10 vela hlaah inzar pharhin thing ṭiak 380 an phun a ni.

Chawhma dar 11-ah thing phunna tur hmunah hawnna inkhawm buatsaih niin, Lawngtlai Bawrhsap charge la mektu Pu Abraham Beirazi Khithie chu Khuallian a ni a. Khuallian chuan tunlai khawvel changkang chho zel rualin Mizoramah pawh hmasawnna a awm a, tun hma kan pi leh pute hun laia chhehvel boruak (environment) ṭha tak kan neih ṭhin chu tunah chuan thawnthu sawia sawi a ṭul ta, a ti a. Hmasawnna chuan thil ṭha tam tak rualin thil ṭha lo tam tak a keng tel a, inkal pawhna kawng ṭha tak tak kan sialte'n lehlamah thing leh mau leh lui te a tichhia a, pumpelh theih a ni lo tiin, tunah chuan kan lui tui leh boruak te pawh a thianghlim tawk tawh lo va, sarang leh plastic kan hman nasat avangin kan ram leilungin a tuar hle a, bawlhhlawh leh tuichhe paih kan fimkhur loh avangin leilungin a chhiat phah nasa hle bawk tih a sawi a. Hmasawnna kan zuan rualin, hmasawnna tlo, thing leh mau leh nungcha tichereu lo zawnga hmasawnna kalpui dan kan ngaihtuah a ngai a, leilung leh chhehvel boruak tichhe lo tura khawsak dan hi inchhungkhurah pawh kan inzirtir tam a pawimawh a ni, a ti. Mi thiamte sawi danin, United Nations-in Sustainable Development Goal a duan 17 zinga a tam zawk tihpuitlin nana activity pawimawh ber chu thing phun a ni a, chu chuan kan chhehvel boruak chhe mek siam ṭhat nan thing phun a, enkawl zui a pawimawhzia a tar lang chiang hle, a ti a. Thing phun leh enkawl zui kawnga hma kan lak ṭhat chuan hmasawnna tluantling leh tlo zawk, mi tin huap zo kan nei thei dawn a ni, a ti.

Kumin Green Mizoram Day thupuiah hian "Thing phun i la, i enkawl zui ang u" tih chu hman a ni a. Green Mizoram Day puala inkhawm tawi buatsaih hi LADC-a District Council Conservator of Forests (DCCF), District Level Committee on Green Mizoram-a Member Secretary ni bawk Pu K. Lalromawia chuan kaihruaiin, kal khawmte'n thing phun leh enkawl zui kawnga hma la tura intiamna (pledge) an chham rual a. LADC-a Deputy Conservator of Forests (DCF) Pu C. Sangliana chuan Lawngtlaia Green Mizoram Day hman tawh dan leh hriat tur pawimawh a sawi a. Kangmei ven kawnga thawk ṭha khua chawimawina 'Village Level Fire Prevention Award 2023' dawngtu khuate hnenah Khuallian chuan lawmman a hlan bawk.

Village Level Fire Prevention Award 2023 lawmman pakhatna hi Thaltlang khuain an dawng a; pahnihna chu Lungzarhṭum niin, Vawmbuk chu pathumna an ni a. Lawmmanah hian thuziak leh pawisa fai - 1-na ₹ 50,000/-, 2-na ₹ 30,000/- leh 3-na ₹ 20,000/- te hlan an ni.

Hawnna hun hman zawh hian ceremonial planting buatsaih niin, Khuallian bakah, Superintendent of Police, Project Director DRDO, LADC Executive Secretary leh LADC Court President & Recorder te'n thing ṭiak pakhat ṭheuh an phun a. Hemi hnu hian Nodal department, LADC-a Environment, Forests & Climate Change Department lamin department hrang hrangte thing phunna tur hmun an ruahman saah thing phun tur leh a hungna tur an lo chhawp lawk angin department hrang hrangte chuan thing hi phunin, he'ng an thing phunte hi ṭha takin an hung nghal bawk a ni.

Green Mizoram Day hi a tirah chuan "Green Aizawl" tiin kum 1998 khan Aizawlah hman ṭan a ni a. Kum 1999 aṭangin "Green Mizoram" tih hming chawiin ram pumah hman a ni. Lawngtlai District bikah chuan kum 2000 aṭang khan hman ṭan niin, kum tin hman a ni a. Kum hmasa lam eng emaw ti chhung kha Green Mizoram Day hian Lawngtlai leh Mampui inkar kawngpui dungah thing phun ṭhin a ni a. EF&CC Department chhinchhiah danin Mampui kawnga thing phun zingah hian 1,485 chu a nung a, za zelah sawmkua (90%) nung ang a ni. Nikum aṭang khan KMMTTP kawngpui dungah thing hi phun a ni ve ta thung a. Nikum khan thing ṭiak 350 phun niin, LADC EF&CC Department chuan enkawl zuiin, a nung ṭha vek a. Kuminah hian thing ṭiak 380 phun ni ve lehin, department hrang hrangte'n anmahni thing phun ṭheuh hi an enkawl zui dawn a. A enkawl ṭha lawmman te pawh siam tum a ni.