738/2023-2024

Aizawl the 9th June 2023 : Vawiin khan Mizoram Rural Bank Conference Hall MINECO-ah Mizoram Samagra Shiksha hmalakna tur Ministry of Education-a Project Approval Board (PAB)-in a pawmte  thlirho a ni a, School Education Secretary Dr Lalzirmawia Chhangte-in he hun hi a hmanpui.

Dr Lalzirmawia Chhangte Secretary chuan he hunah hian thusawiin kan syllabus leh curriculum-ah NCERT kan zui a,  textbook pawh NCERT  kaihhruaina zuia siam tho a ni a, heti chung hian kan țhalaite All India Service-ah an tling hlei thei lo hi eng vang nge niang? Khawi lai tak hi nge kan tih fuh loh leh chak lohna tih hi  ngaihtuah a ngai hle a ti a. Class room-a kan inzirtir dan kalphungte pawh exam-a tih țhat kan tum lutuk a ni mai awm mang e tih te pawh ngaihtuah theih a ni a ti a.  NCERT text book-in min hruai a tumna hi hriat mai ni lovin engtia tih tur nge tih ngaihtuah thiamna neih a ni a, heti lamah hian kan kal nat a, zirlaite kuta mawhphurhna dah thiam a pawimawh a, zirlaite hi anmahnia ngaihtuah thiamna nei tur leh chumi ziak chhuak thiam tura kaihhruai chu a ngai a, class room zirtirna en ngun a, teacher-te pawh intuai thar a țul hle a ni a ti. Secretary chuan zirna hnathawhah hian quality education ngaih pawimawh a ngai a, quality pawt hniam lova kal a ngai tih a sawi bawk.

Samagra Shiksha hnathawh dan tur thlirhonaah hian State Level Higher Secondary School Plugging Challenge 2022-23 lawmman sem nghal a ni a, he intihsiakna hi HSS Eco club ten faina kawnga an hnathawh tarlanna video clip ațanga teh a ni. Lawmman pakhatna Vairengte HSS, Kolasib Dist ten an dawng a, pahnihna Lungsen HSS, Lunglei Dist., pathumna Sangau HSS Lawngtlai Dist. an ni.

Samagra Shiksha hnathawh dan tur thlirhona State Project Director  Pu Lalhmachhuana kaihhruaiah hian Programme Officer-ten an hna chan țheuh bawhzui dan tur an sawifiah a, State Project Office leh  District tin ațangin Samagra Shiksha Officer leh staff te an tel a ni.